КоронавирусыкIэу къежьагъэм фэгъэхьыгъэ къэбарыр игъэкIотыгъэу зыми ышIэрэп, ау ар тищыIэныгъэ хэты зыхъугъэм къыщыублагъэу ушэтынхэр ашIых, пэуцужьышъущтым, ар къэзымыгъэхъущтым афэ­гъэхьыгъэу шIэныгъакIэхэри щыIэ мэхъух. Анахь упчIабэу къэу­цу­хэ­рэм джэуапхэр къаретыжьых Роспотребнадзорым.

— Врачхэмрэ эпидемиологхэм­рэ къаIо бжыхьэр къызихьэкIэ вирусхэм апкъ къи­кIырэ зэпахырэ узхэу къежьэ хабзэхэм коронавирусымкIэ Iоф­хэм язытет къыгъэхьы­лъэщтэу. Сыд фэдизэу ащ ущыщынэн фая?

— Зэпахырэ узхэр къыз­хэкIыхэрэ вирус лъэпкъ зэ­фэшъхьафхэр къызэдежьэхэу медицинэ практикэм бэрэ щагъэунэфы. Анахьэу бжыхьэ­-кIы­мэфэ лъэхъанхэм узыр нахь хьылъэу сымаджэхэм зэпачы. Псауныгъэр зэщызымыгъэкъорэ щыIакIэр, врачхэм аIорэр гъэцэ­кIэгъэныр, гриппыр къэ­зы­мыгъэ­хъущтым пае щыIэ при­вивкэр зыхягъэлъхьэгъэныр — мыхэр анахьэу цIыфхэри, яIахьылхэри зыухъумэщтхэм ащыщых.

— Эпидемиологическэ лъэ­хъан пэпчъкIэ грипп лъэпкъ зэфэшъхьафхэр къе­жьэнхэр хабза? Хьауми анахь грипп щынагъор джы къежьэным тыфэхьазырын фая?

— Илъэс къэс пIоми хъунэу грипп лъэпкъ зэфэшъхьаф­хэм таIокIэ. Джырэ уахътэм къэбар тIэкIэлъэп 2020 — 2021-рэ илъэсхэм къежьэн ылъэкIыщтыр зыфэдэм фэгъэхьыгъэу. Ау зыщытымыгъэгъупшэрэр илъэс къэс гриппкIэ хьылъэу сымаджэхэрэм, нэмыкI узхэри къызфыздихьы­хэрэм, зидунай зэригъэхъожьхэрэм япчъагъэ дунаимкIэ зэрэбэр ары.

— Сыдигъуа ыкIи тыда гриппым пэуцужьырэ прививкэр зыщябгъэшIы хъущтыр? Тикъэралыгъо къы­щашIыхэрэ вакци­нэхэмрэ IэкIыбым къыщыдагъэкIыхэрэмрэ сы­да зэрэзэтекIыхэрэр уасэм нэмыкIэу?

— Вакцинэр захалъхьэрэр шышъхьэIу мазэм иятIонэрэ Iахь е Iоныгъо мазэр ары, сымэ­джагъэхэм япчъагъэ къыхэхъо­нэу ымыублэзэ. Ащ тегъэпсы­хьэгъэ хэушъхьафыкIыгъэ ка­бинетхэр щыIэх, ахэм ащыщхэр прививкэхэр зыщахалъхьэхэрэ уахътэм тедзэу къызэIуахых. Вакцинэр IэзапIэм, сымэджэщым е ащ тегъэпсыхьагъэу къызэIуахыгъэ чIыпIэм къызщыхябгъэлъхьан плъэкIыщт. Урысыем къыщыдагъэкIыгъэмрэ IэкIыбым къыщашIыгъэмрэ зэрэзэтекIыхэрэ щыIэп. А зэ­пстэури псауныгъэм икъэу­хъумэнкIэ дунэе организацием игъо зэрилъэгъугъэу къыда­гъэкIых.

— «Гриппым пэуцужьырэ прививкэхэм Iоф ашIэрэп» — мы гущыIэхэр бэрэ агъэфедэх. Шъып­къэмкIэ, ахэм ­уащыгугъы хъущта узыр къыбнэмысынымкIэ е хьылъэу умысымэджэнымкIэ?

— ГриппкIэ усымэджэн зэ­рэплъэкIыщтым вакцинэм къыкIырегъэчы, ау умысымэ­джэ­хэнэу ащ ышIын ылъэкIыщтэп. Къыхэгъэщыгъэн фае, ар зыхалъхьагъэхэм узыр хьылъэу зэпичыгъэу е ищыIэныгъэ зыдихьыгъэу къахэкIырэп пIоми хъущт.