Тишъолъыр ипарламент и Тхьаматэу Владимир Нарожнэр, ащ игуа­дзэхэу Iащэ Мухьамэдрэ Шъэо Аскэррэ, парламент комитетхэм япа­щэхэр, лъыплъэн, уплъэкIун къулыкъухэм ялIыкIохэр бэмышIэу Iу­кIа­гъэх УФ-м и Федеральнэ ЗэIукIэ ФедерациемкIэ и Совет Рег­ла­ментымкIэ ыкIи парламент IофшIэныр зэхэщэгъэнымкIэ и Комитет итхьаматэ иапэрэ гуадзэу Светлана Горячевам.

А хъугъэ-шIагъэм епхыгъэу республикэ парламентым изэ­хэсыгъо Федеральнэ Законэу «Урысые Федерацием къэралыгъо уплъэкIуныр (лъыплъэныр) ыкIи муниципальнэ уплъэ­кIуныр щызэхэщэгъэнхэм фэ­гъэхьыгъ» зыфиIорэм ипроект итегущыIэн къыхиубытэу Адыгэ Республикэм предпринимательхэм яфитыныгъэхэр къэухъумэгъэнхэмкIэ и Уполномоченнэу Зэфэс Вячеслав къыгъэхьазырыгъэ къэбарым едэIугъэх. Ар фэгъэхьыгъагъ коронавирусым зыщыпэуцужьыхэрэ лъэхъаным предпринимательхэм яфедэ­хэм­рэ яфитыныгъэхэмрэ къэухъу­мэгъэнхэм ылъэныкъокIэ Iофхэм язытет.

— Iоф зытшIэрэм къыщыублагъэу республикэм ипред­принимательхэм гъогогъу мини 10-м ехъурэ зыкъытфагъэзагъ. Ахэм азыныкъом янахьыбэр яфе­дэ хэлъэу зэшIотхыгъ. ­Илъэс къэс зыкъызэрэтфагъэзэрэ пчъа­гъэм хэхъо. Ащ къегъэлъа­гъо предпринимательхэм цыхьэ нахь къытфашIы зэрэхъугъэр. ТиIофшIэнкIэ анахь къэгъэлъэгъон шъхьаIэр ащ ишыхьат —бизнесым административнэу зэрэтеIункIэхэрэм ииндекс. Къы­хэзгъэщын ащкIэ Адыгеим я 3-рэ чIыпIэр зэриIыгъыр, — къыIуагъ Зэфэс Вячеслав пэублэм.

Ащ къызэрэхигъэщыгъэмкIэ, пандемием илъэхъан анахьыбэу зыкъызэрафагъэзагъэр субсидиехэм япхыгъ. Анахь зыгъэгумэкIыщтыгъэхэр ОКВЭД-хэм ащыщыбэ коронавирусым нахь зэрарыбэ зэригъэшIыгъэхэм ахэфэнэу зэрэмыхъугъэр ары, анахьэу ОКВЭД-хэу: 47,1-р, 47,8-р, 47,9-р, 45,2-р. Ащ къы­хэкIэу субсидие ахэм аратыгъэп. УФ-м и Правительствэ и Постановлениеу N 434-р ыкIи N 576-р заштэхэм ыуж Iофхэр нахь къэбырсырыгъэх. Адырэ ОКВЭД-хэу коронавирусым зэрар зэрихыгъэкIэ алъытагъэ­хэми игъом банкхэм субсидие къаратыгъэп.

— ГъогогъуитIоу Мыекъопэ прокуратурэм зыфэзгъэзэнэу хъугъэ, Iофыр зэшIохыгъэным фэшI. КъызэрэтэолIэгъэ Iофыгъохэр зэфэпхьысыжьмэ, ахэм янахьыбэр унэе предпринимательхэу мыгъомылэпхъэ товар­хэр зыщэхэрэр, шхапIэхэр зы­Iыгъхэр, туристическэ секторыр, транспортым итехническэ зытет лъыплъэхэрэр, парик­махерскэ­хэр, химчисткэхэр, цIыфхэр зе­зыщэхэрэр ары зы­къытфэзыгъэзагъэхэр. Ахэм юридическэ консультацие ят­тыгъ, IэпыIэгъуи тафэхъугъ. Банкым реструктуризациеу ригъэкIокIырэм епхыгъэ Iофыгъо­хэм ямэхьанэ къыпкъырыкIызэ, Уполномоченнэм Лъэпкъ Банкым зэзэгъыныгъэ дишIыгъ предпринимательхэм яфитыныгъэхэр къэухъумэгъэнхэм фэгъэхьыгъэу. Iофхэм ащыщхэм УФНС-м илIыкIохэр къыхэла­жьэхэзэ тахэплъагъ, — къыхигъэщыгъ Зэфэс Вячеслав.

Джащ фэдэу ащ къыхигъэ­щыгъ мы илъэсым игъэтхапэ къыщыублагъэу КНО-м уплъэ­кIунэу ышIыгъэхэми Уполномоченнэм ынаIэ зэратетыгъэр. ЛъыплъэкIо къулыкъухэм ащыщ­хэм уплъэкIунхэр бэкIэ нахь макIэ ашIыгъэх.

Мы лъэныкъомкIэ щыIэ законодательствэр нахь гъэтэрэзыгъэнымкIэ предложениеу Уполномоченнэм къыхьыгъэхэр къыдалъытагъэх ыкIи УФ-м ФедерациемкIэ и Совет РегламентымкIэ ыкIи парламентскэ IофшIэныр зэхэщэгъэнымкIэ и Комитет агъэхьыгъэх ахэм ахэплъэнхэм фэшI. Ахэр зыфэгъэхьыгъэхэр коронавирусым зэрар нахь зэригъэшIыгъэкIэ алъытэрэ отраслэхэм яперечень нахь зырагъэушъомбгъуныр; бизнесым хьакъулахь емыгъэтыгъэным, бэджэнд уасэм итын 2022-рэ илъэсым нэс зэпы­гъэугъэным, АР-м и ЛIышъхьэ дэжь бизнесыр къэухъумэгъэнымкIэ Совет щызэхэщэгъэным иамал щыIэным.