УФ-м и Президентэу Владимир Путиныр кIэщакIо зыфэхъугъэ лъэпкъ проект 12-м щыщэу 11-р ары Адыгеим щыпхыращырэр. Ахэр гъэцэкIэгъэнхэм пае шъолъыр проект 50-у аштагъэм 2020-рэ илъэсым сомэ миллиарди 4,2-рэ пэIуагъэхьащт.

Ащ щыщэу миллиарди 3,6-р федеральнэ ахъщ, сомэ миллион 558-р республикэ бюджетым къыхэхыгъэщт, сомэ миллион 37-р муниципальнэ образованиехэм хагъэхъощт. Агъэнэфагъэм щыщэу сомэ миллиарди 3,7-рэ зытефэщт IофшIэнхэм язэшIохын пае зэзэгъыныгъэхэм акIэтхэгъахэх.

Лъэпкъ проектэу «Псауныгъ» зыфиIорэм къыщыдэлъытагъэу зэшIуахыщтхэм сомэ миллион 829-рэ апэIухьащт. Сомэ миллион 717-рэ зытефэщт IофшIэнхэмкIэ зэзэгъыныгъэхэр адашIыгъахэх. А ахъщэмкIэ Адыгэ республикэ онкологическэ диспансерым, Адыгэ республикэ ыкIи Мыекъопэ къэлэ сымэджэщ­хэм, кIэлэцIыкIухэм апае диагностическэ гупчэм, ахэм зыщяIазэхэрэ сымэджэщым, поликлиникэхэм ящыкIэгъэ оборудованиер, техникэр афащэфыщт.

Джащ фэдэу мы Лъэпкъ проектым игъэцэкIэн пае аштэгъэ шъолъыр проектэу «Развитие системы оказания первичной медицинской помощи» зыфиIорэм къыдыхэ­лъытагъэу мы илъэсым ФАП 23-рэ кIэу ашIын гухэлъ яI, 19-р рагъэжьэгъах.

«Гъэсэныгъ» зыфиIорэ проектым игъэцэкIэн пае сомэ миллион 866-рэ агъэнэфагъ. АщкIэ нэбгырэ 1100-мэ ателъы­тагъэу Мыекъуапэ ыкIи нэбгырэ 250-мэ — станицэу Ханскэм ащырагъэжьэгъэ еджапIэхэр аухыжьыщтых, еджэпIибгъумэ спортзалхэр ащагъэкIэжьыщтых, нэмыкIэу кIэлэеджакIохэм хэ­хъоныгъэхэр ашIынхэм фытегъэ­псыхьэгъэ IофшIэн зэфэшъхьафыбэ зэшIуа­хыщт.

Лъэпкъ проектэу «Культу­рэм» къыщыдэлъытагъэхэм япхырыщын 2020-рэ илъэсым сомэ миллиони 106-рэ пэIу­хьащт. АщкIэ культурэм и Унэу 5 республикэм мы илъэсым щагъэ­кIэжьыщт, къуаджэу Фэдз кIэу щырагъэжьагъэм ишIын аухы. Джащ фэдэу культурэм ылъэныкъокIэ гъэсэныгъэ зыща­рагъэгъотырэ учреждениехэм, библиотекэхэм ящыкIагъэхэр афащэфыщтых.

«Щынэгъончъэ ыкIи шэпхъэ­шIухэм адиштэрэ гъогухэр» зыфиIорэ лъэпкъ проектым къыщыдэлъытагъэу 2020-рэ илъэсым зэшIуахыщтхэм сомэ миллион 637-рэ апэIуагъэхьащт. АщкIэ автомобиль гъогу километрэ 49-рэ агъэцэкIэжьыщт, агъэкIэжьыщт, видеокамерэ 52-рэ агъэуцун гухэлъ яI.

«Предпринимательствэ цIыкIум ыкIи гурытым IэпыIэгъу афэхъугъэныр» зыфиIорэм ипхырыщын сомэ миллион 267-рэ мы илъэсым пэIухьащт. Ащ къыхэхыгъэу «Мой бизнес» зыфиIорэ Гупчэм, экспортым IэпыIэгъу егъэгъотыгъэнымкIэ Гупчэм пшъэры­лъэу яIэхэм ягъэцэкIэн пае ахъщэхэр афэ­кIох, езгъэжьэгъэ­кIэ фермерхэм грантхэр, субсидиехэр аратых.

«Демография» зыфиIорэ проектым игъэцэкIэн пэIухьанэу мы илъэсымкIэ сомэ миллиардрэ миллион 237-рэ агъэнэфагъ. Мыщ къыщыдэлъытагъэу Адыгеим икъэлэ шъхьаIэ зы кIэлэцIыкIу IыгъыпIэ щаухы­жьыщт, щы рагъэжьэщт. Джащ фэдэу спорткомплексэу мыл зытелъ площадкэ зиIэр аухыгъ, джыри комплекси 4 рагъэжьагъ.

Мы проектым ипхырыщын пае кIэлэцIыкIу къызэрыхъухьэгъэ унагъохэм IэпыIэгъу ятыгъэ­ным фытегъэпсыхьэгъэ шъо­лъыр проектэу аштагъэм къыдэлъытагъэу ягъот макIэу унэгъо 3407-мэ ахъщэкIэ адеIагъэх.

Лъэпкъ проектэу «ПсэупIэр ыкIи къэлэ щыIакIэр» зыфи­Iорэм къыщыдэлъытагъэу зэшIуа­хыщтхэм сомэ миллиони 176-рэ пстэумкIи апэIухьащт. Мыгъэ ащкIэ общественнэ чIыпIэ 14, фэтэрыбэу зэхэт унэхэм ящагу 34-рэ зэтырагъэпсыхьажьынэу агъэнэфэгъагъ. Ахэм ащыщэу чIыпIи 5-мэ IофшIэнхэр ащаухыгъэх, щагу 28-р агъэкIэжьыгъах.

Адыгэкъалэ исаугъэт зэхэтэу «ТекIоныгъ» зыфиIорэм къызэлъиубытырэ чIыпIэри мы проектым къыщыдэлъытагъэу зэтырагъэпсыхьэ.

«Экология» зыфиIорэ Лъэпкъ проектым игъэцэкIэн сомэ миллион 98-рэ пэIухьащт. Ащ ипхырыщын пае аштэгъэ шъолъыр проектэу «Чистая вода» зыфиIорэм къыщыдэлъытагъэу къуа­джэу Кощхьаблэрэ селоу Красногвардейскэмрэ ащыпсэухэрэм псы къабзэ аIэкIэзгъэ­хьащт псэуалъэхэр ащашIых. КъэкIощт 2021-рэ илъэсым ащ фэдэ псэолъэ 15 муниципальнэ образовании 5-мэ ащагъэцэкIэжьынэу агъэнэфагъ.

Мы лъэпкъ проектым игъэцэкIэн пае аштэгъэ шъолъыр проектэу «Мэзхэр къэгъэнэжьыгъэнхэр» зыфиIорэм къыдэлъы­тагъэу мэзым машIом зыкъыщиштэмэ ащ зэребэныщтхэр ыкIи чъыгхэм ягъэтIысхьан ящыкIэгъэ техникэ зэфэшъхьафхэр ащэфыгъэх, мэз хъыз­мэт IофшIэнхэр зэшIуахыгъэх.

Пыдзэфэ пытэхэм узэрадэзекIощтым исистемэ гъэпсыгъэ­ным фэгъэхьыгъэ шъолъыр программэм къыщыдэлъытагъэу, хэкIым идэщын фэгъэзэгъэ региональнэ операторым иIоф­шIэн пэIухьанэу сомэ миллион 30 федеральнэ бюджетым къы­хэхыгъэу къатIупщыгъ.

Лъэпкъ проектэу «Цифровая экономика» зыфиIорэм къыщыдэлъытагъэу Адыгеим щыпхыращыщтхэм сомэ миллиони 4,3-рэ, «Международная кооперация и экспорт» зыфиIорэм игъэцэкIэн сомэ миллион 27-рэ апэIухьащт.

ХЪУТ Нэфсэт.