Сомэ мин 78-рэ къызэкIигъэкIо­жьыгъ

Республикэм икъэлэ шъхьаIэ дэс хъулъфыгъэм банкым къыIихыгъэ чIыфэр игъом зэрэримытыжьыгъэм къыхэкIэу сомэ мин 78-рэ зэтехъуагъ.

Хьыкумым унашъоу ышIыгъэм диштэу хьыкум приставхэм я Мыекъопэ къэлэ отдел хъулъфыгъэм ылъэ­ныкъокIэ Iоф къызэIуихыгъ.

Хьыкум приставым уплъэкIунхэр ригъэкIокIыхэзэ, хъулъфыгъэм автотранспорт тетхагъэу ыгъэунэфыгъ, ар ыгъэфедэн фимытынэу унашъуи ышIыгъ.

ЧIыфэ зыте­лъым а къэбарыр зызэхехым кредитнэ организацием зэхэубытагъэу ахъщэр фыригъэ­хьажьыгъ.

КIэлэпIупкIэр…

Хьыкум приставхэм яотделэу Красногвардейскэ районым щыIэм икъулыкъушIэхэм Iофэу агъэцэкIагъэм ишIуагъэкIэ кIэлэпIупкIэм итынкIэ сомэ мин 400 хъурэ чIыфэр хъулъфыгъэм къыпщыныжьыгъ.

Автомобилыр зэрифэнымкIэ ифитыныгъэ зэтырагъэуцожьыным фэшI зыныбжь имыкъугъэ исабыйхэм атефэрэ ахъщэр ащ афызэкIигъэкIожьыгъ.

Хьыкум приставхэр чIыфэ зытелъым пчъагъэрэ IукIагъэх, дэгущыIагъэх, ау ахъщэр къызэкIигъэкIожьын зэрэфаем ар егупшысагъэп. Ащ къыхэкIыкIэ егъэзыгъэкIэ ахъщэр къырагъэпщыныгъ.

Игъом птын фае

Мыекъуапэ Iоф щызышIэрэ унэе предпринимателым хэбзэIахьым итынкIэ чIыфэу зэIуигъэкIагъэр хьыкум приставхэм къырагъэпщыныжьыгъ.

Хьакъулахь инспекцием зэкIэмкIи сомэ мини 120-рэ фызэкIигъэкIожьынэу ащ щытыгъ.

Хьыкум приставым предпринимателым мылъкоу иIэр зэригъэшIагъ, ащ арест тырилъхьагъ. Ащ ыуж хъулъфыгъэм чIыфэу телъыр къыпщыныгъ.

ЯзекIуакIэ зэрэмытэрэзыр агурагъаIо

КIэлэпIупкIэр игъом зымытыхэрэм язекIуакIэ зэрэмытэрэзыр агурыгъэIогъэным, зытефэхэрэм пшъэдэкIыжь пхъашэ ягъэхьыгъэным хьыкум приставхэм анаIэ тет.

Пшъэрылъхэр гъэцэкIагъэ зэрэхъурэм ежь ышъхьэкIэ лъэплъэ республикэм ихьыкум пристав шъхьаIэ. Хэбзэгъэуцугъэм мы лъэныкъомкIэ къыдилъытэрэ шапхъэ­хэр агъэлъэшыгъэх, ны-тыхэу зипшъэрылъхэр зымыгъэцакIэхэрэм уголовнэ Iофхэр къапагъэтаджэхэу къыхэкIы. Ащ Iофыр нэшъумыгъэсэу, алиментхэр игъом ыкIи икъоу шъутынхэу хьыкум приставхэр къы­шъоджэх.

Хьыкум приставхэм яфедеральнэ къулыкъу и Гъэ­IорышIапIэу Адыгэ Республикэм щыIэм Iофтхьабзэу «Хьыкум приставхэр – кIэлэцIыкIухэм апай» зыфиIорэр илъэс къэс зэхещэ. КIэлэпIупкIэмкIэ чIыфэхэр къаIы­хыжьыгъэнхэм пае зипшъэрылъхэр зымыгъэцэкIэрэ ны-тыхэм адэжь хьыкум приставхэр макIох, ахэм адэгущыIэх, язекIуакIэ зэрэмытэрэзыр агурагъэIо. Сабыим ипIункIэ хэбзэгъэуцугъэм къыгъэнэфэрэ лъэ­ныкъохэр зымыгъэцакIэхэрэм административнэ пшъэ­дэкIыжь зэрахьыщтым дакIоу, уголовнэ Iофи къафызэIуахын зэралъэкIыщтыр араIо. ЗэдэгущыIэгъу­хэм ахэлажьэх динлэжьхэр, муниципальнэ образованиехэм, гурыт еджапIэхэм япащэхэр, къэбар жъугъэм иамалхэм ялIыкIохэр, нэмыкIхэри.

Джащ фэдэу кIэлэпIупкIэр зымытыхэрэм Iоф зыщашIэрэ организациехэм ябухгалтериехэр хьыкум приставхэм ауплъэкIух, охътэ гъэнэфагъэм къэралыгъом икIынхэ зэрэфимытхэм фэгъэхьыгъэ унашъохэр ашIых, административнэ хэбзэукъоныгъэ зэрашIыгъэм­кIэ протоколхэр зэхагъэуцох, уголовнэ Iофхэр къызэIуахых, чIыфэ зытелъхэм ямылъку арест атыралъхьэ, IофшIэпIэ чIыпIэ зимыIэхэм цIыфхэм IофшIапIэ языгъэгъотырэ гупчэм иучет хагъэуцох. Мы унашъохэм зэкIэми пшъэрылъэу яIэр зы – сабыйхэм къатефэрэр игъом ыкIи бырсыр къыпымыкIэу ны-тыхэм къатыныр ары.

Тазыр 20-м ехъу къыпщыныгъ

Мыекъуапэ щыпсэурэ хъулъфыгъэм гъогурыкIоным ишапхъэхэр пчъагъэрэ зэриукъуагъэхэм къыхэкIэу сомэ мин 17 зытефэрэ тазыр 20-м ехъу къытыралъхьагъ.

Хьыкум пристав-гъэцэ­кIакIор чIыфэ зыте­лъым зыIо­кIэм тазырыр къыпщынын, уна­шъор игъом зимы­гъэца­кIэкIэ къы­зэ­кIигъэкIо­жьын фаем джыри хэ­хъо­нышъ, ар сомэ мин 22-м шIо­кIын зэ­рилъэ­кIыщтыр гуригъэIуагъ.

Къулыкъу­шIэм къыриIуа­гъэр хъулъфыгъэм къыгурыIуагъ, чIыфэр къыпщыныгъ, ащкIэ Iофыр зэфашIыжьыгъ.

НэкIубгъор зыгъэхьазырыгъэр Тхьаркъохъо Адам.