Урысые Федерацием и Конституционнэ Хьыкум IофшIэнымкIэ ко­дексым ия 392-рэ статья иа 1-рэ Iахь Урысые Федерацием и Кон­ституцие димыштэу ылъытагъ, сыда пIомэ хэбзэнчъэу цIы­фыр Iоф­шIапIэм зэрэIуагъэкIыгъэмкIэ зэрарэу рахыгъэр къыфалъэ­гъу­жьы­ным пае хьыкумым лъэIу тхылъкIэ зызщыфигъэзэн ылъэкIыщт пIалъэр ащ къыщыгъэнэфагъэу щытэп.

Хьыкумым иунашъо къызэрэщиIорэмкIэ, Урысые Федера­цием IофшIэнымкIэ икодекс ия 392-рэ статья иа 1-рэ Iахь Урысые Федерацием и Кон­ституцие (ия 19-рэ статья иа 1-рэ Iахь, ия 46-рэ статья иа 1-рэ Iахь) диштэрэп, сыда пIомэ моральнэ лъэныкъомкIэ зэ­рарэу рагъэхьыгъэр къыфа­лъэгъужьыным пае цIыфым лъэIу тхылъкIэ зызщафигъэзэн ылъэкIыщт пIалъэр къы­гъэнафэрэп.

Мы Iофым иуплъэкIун фе­жьэнхэмкIэ лъапсэ хъугъэр ФСИН-м иакадемие икурсантэу Чэтыжъ Рэмэзан илъэIу тхылъ ары. Ар апшъэрэ еджапIэм къычIагъэкIыгъ, курсант IэнатIэми IуагъэкIыгъ. Хьыкумым ащ зыфигъази, зэрэIуа­гъэкIыгъэмкIэ унашъоу агъэ­хьазырыгъагъэм кIуачIэ имы­Iэжьэу хъугъэ, къулыкъуми пи­дзэжьыгъ. Нэужым етIани ащ хьыкумым зыфигъэзагъ хэ­бзэнчъэу зэрэIуагъэкIыгъагъэм пае сомэ мин 500 апшъэрэ еджапIэм къыритыжьынэу. Рязанскэ хьыкумыр тхылъэу къыIэкIэхьагъэм хэплъэн ыдагъэп ыкIи ащкIэ IэубытыпIэ ышIыгъэр IофшIэнымкIэ ко­дексым зигугъу къышIырэ шапхъэр ары. Ащ къызэрэди­лъытэрэмкIэ, IофышIэм ифи­тыныгъэхэр зэраукъуагъэхэр зи­шIэгъэ мафэм къыщыублагъэу мэзищым къыкIоцI, зэрэ­IуагъэкIырэмкIэ унашъоу ашIыгъэр къызыратыжьыгъэ мафэм къыщегъэжьагъэу зы мазэм къыкIоцI искыр ытын зилъэкIыщтыр. Хьыкумым зэрилъыта­гъэмкIэ, Чэтыжъ Рэмэзан а пIа­­лъэхэр блигъэкIыгъэх.

Ащ нэужым Урысые Федерацием и Конституционнэ Хьыкум ащ зыфигъэзагъ. Курсантым зэрилъытэрэмкIэ, IофышIэм ифитыныгъэхэр зэрау­къуагъэхэр хьыкумым къызи­гъэнэфэрэ нэужым къыкIэ­лъыкIорэ мэзищыр ары къы­хиубытэн фаер. Конституционнэ Хьыкумым ащ къыдыригъэштагъ ыкIи къыхигъэщыгъ: Iоф­шIэнымкIэ кодексым зэхъокIыныгъэхэр фашIыфэхэ нэс IофышIэм фитыныгъэ иI ахъщэ къыфалъэгъужьыным ыкIи ащ дакIоу Iоф ышIэнымкIэ фитыныгъэу иIэхэр зыпкъ рагъэуцо­жьынхэм кIэдэунэу е хьыкумэу ащ фитыныгъэхэр зыпкъ изгъэу­цожьыгъэм ышIыгъэ унашъом ыуж мэзищ пIалъэкIэ лъэIу тхылъыр аIэкIигъэхьанэу.

Мы унашъор къыдилъытэзэ, общэ юрисдикциемкIэ хьыкумыр Чэтыжъым иIоф хэплъэ­жьынэу Конституционнэ Хьыкумым фигъэнэфагъ.

Адыгэ Республикэм и Конституционнэ Хьыкум исекретариат