«Петербургская политика» зыфиIорэ фондым Урысыем ишъолъырхэм языпкъитыныгъэ зэригъапши, бэдзэогъу мазэмкIэ зэфэхьысыжьхэр къышIыгъэх.

Анахь балл инэу ыгъэнафэрэр 10, ащ щыщэу 7,6-рэ Адыгеим къыхьыгъ ыкIи я 8-рэ чIыпIэр ыубы­ти, анахь зыпкъ ит субъекти 10-мэ ащыщ хъугъэ.

Аналитикхэм къызэрэхагъэ­щырэмкIэ, шъолъыр политикэм блэкIыгъэ мазэмкIэ ихъугъэ-шIэгъэ анахь шъхьаIэхэр Конституцием зэхъокIыныгъэу фэхъу­гъэхэм апае мэкъэтыныр зэрэ­кIуагъэмрэ зэпахырэ узэу дунаир зэлъызыкIугъэм къыздихьыгъэ къиныгъохэм къызэрахэкIыжьы­гъэмрэ.

АдыгеимкIэ анахьэу къыхагъэщыгъэхэр АР-м и ЛIышъхьэу Къум­пIыл Муратрэ псэупIэ-коммунальнэ хъызмэтым зэхъокIыныгъэхэр фэшIыгъэнхэмкIэ Фондым ипащэу Константин Цицинымрэ жъы хъугъэ псэупIэхэм ачIэсхэм ягъэкощын фытегъэпсыхьэгъэ программэм къыщыдэлъытагъэхэр пIалъэ­хэм анахьыжьэу гъэцэкIэгъэнхэм фэгъэхьыгъэ зэзэгъыныгъэм зэрэзэдыкIэтхагъэхэр, гъогухэм ягъэцэ­кIэжьын пае Адыгеим сомэ миллиони 165-рэ федеральнэ бюджетым къыхэхыгъэу къызэрэфэкIощтыр, дагъэ къэзытырэ культурэхэм ячылэпхъакIэхэр къыдэзгъэкIыщт заводэу станицэу Джаджэм щашIыщтыр, Адыгеимрэ Краснодар краим­рэ зэзыпхырэ маршрутхэр къызэрэ­­зэIуахыжьыгъэхэр, бизнесым пы­­лъэу коронавирусым иягъэ зэригъэ­кIыгъэхэм IэпыIэгъу зэфэшъхьафэу аратырэмкIэ республикэр пэрытныгъэ зыIыгъ шъолъыр 15-мэ ащыщ хъугъэу рейтингхэмкIэ Лъэпкъ агент­ствэм зэригъэунэфыгъэр ары.

Анахь дэеу зигугъу къашIыгъэхэр Мыекъопэ къэлэ администрацием ипащэ игуадзэ ылъэныкъокIэ уголовнэ Iоф къызэрэзэIуахыгъэр ыкIи IофшIэпIэ чIыпIэхэм ябэдзэршIыпIэ иIофхэм язытет.