Адыгэ Республикэм и Конституцие ия 71-рэ статья диштэу АР-м иминист­рэхэм я Кабинет изаконо­да­тельнэ инициативэкIэ Къэралыгъо Советым — Хасэм ия LIII-рэ зэ­хэ­сыгъо щаштагъ АР-м и Законэу «Пенсионерыр зэрыпсэун ылъэкIыщт анахь ахъщэ макIэр Адыгэ Рес­пуб­ликэм щыгъэнэфэгъэныр» зыфи­Iорэр.

Шъугу къэдгъэкIыжьын, Федеральнэ законым истатьяу 12.1-м къызэригъэ­нафэу, пенсием социальнэ хэгъахъо фэзышIыхэрэр УФ-м ПенсиехэмкIэ ифонд ичIыпIэ органхэр ары.

Адыгэ Республикэм 2021-рэ илъэсым пенсионерыр рыпсэунымкIэ анахь ахъщэ макIэр УФ-м и Правительствэ иунашъо ипроектэу «Пенсием социальнэ хэгъахъо фэшIыгъэным пае Урысые Федерацием исубъектхэм пенсионерыр рыпсэунымкIэ анахь ахъщэ макIэр ащыгъэнэфэгъэнымкIэ Шапхъэхэр ухэсыгъэнхэр» зыфиIорэм диштэу агъэ­нэфагъ. Федеральнэ законым ия 12.1-рэ статья ия 4-рэ Iахь къызэригъэнафэу, пенсио­нерым ипенсие со­циальнэ хэгъэхъон УФ-м пенсиехэмкIэ ифонд зыфишIырэр ащ къыIукIэрэр УФ-м исубъектэу ар зыщыпсэурэм е зыдэщыIэм анахь ахъщэ макIэу пенсионерыр рыпсэунымкIэ щагъэуцугъэм кIэмыхьэ зыхъукIэ ары. Пенсием федеральнэ социальнэ хэ­гъахъоу фашIырэр зыфэдизыщтыр ар хэтэу пенсио­нерым къыIукIэрэр Урысые Федерацием исубъект пенсионерыр рыпсэунымкIэ анахь ахъщэ макIэу щагъэнэфагъэм кIэзыгъа­хьэрэр ары.

Джащ тетэу мы законым ыгъэнэфагъ 2021-рэ илъэсым пенсионерыр рыпсэунымкIэ анахь ахъщэ макIэр зыфэдизыщтыр – ар сомэ 8388-рэ. Ар Урысые Федерацием пенсионерыр рыпсэунымкIэ анахь ахъщэ макIэу агъэнэфа­гъэм тефэ ыкIи феде­ральнэ законодательствэм дештэ.