АР-м и Къэралыгъо Совет — Хасэм и Тхьаматэ игуадзэу Шъэо Ас­кэр джырэблагъэ Мыекъопэ районым ипсэупIэ койхэр, мэкъумэщ хъызмэтым ичIыгухэр къыкIухьагъэх. ЦIыфым зиягъэ езыгъэкIырэ уц шIоеу амброзиер ары ушъхьагъу шъхьаIэу фэхъугъэр.

Ащ игъэкIодын нахь чанэу дэлэжьэнхэу къызщиIорэ джэ­псалъэу республикэ къэралыгъо ыкIи чIыпIэ зыгъэIорышIэжьыпIэ хэбзэ органхэм, зэкIэ цIы­фэу исхэм афэгъэзагъэр Парламентым гъорекIо ыштэгъагъ. Нэужым ар гъэцэкIагъэ зэрэ­хъурэм зыщагъэгъозэнэу Владимир Нарожнэмрэ Шъэо Ас­кэррэ муниципальнэ образо­ваниехэр къакIухьагъэх. ЩыкIа­гъэхэр мымакIэу джащыгъум къыхагъэщыгъагъэх, джыри мы­гъэ ахэм къафагъэзэ­жьыгъ.

Парламентым ипресс-къулыкъу тызэрэщигъэгъозагъэмкIэ, АР-м мэкъу-мэщымкIэ и Ми­нистерствэ испециалистхэр, уц шIоим пэшIуекIогъэным фэгъэзэгъэ Межведомственнэ комиссием хэтхэр, Россельхознадзорым Къыблэ шъолъырымкIэ имежрегиональнэ ГъэIорышIапIэ илIыкIохэр, нэмыкIхэр игъусэхэу къутырэу Красная Улька зыфиIорэм, поселкэхэу Красно­октябрьскэм, Каменномостскэм Шъэо Аскэр ащыIагъ. Ахэм яурамхэм ямызакъоу, социальнэ псэуалъэхэм, гъэсэныгъэм, культурэм, псауныгъэм икъэу­хъумэн яучреждениехэм ящагухэри къаплъыхьагъэх.

— Мыекъопэ районым ана­хьэу тынаIэ зыкIытетыр, нэ­мыкI субъектхэм Адыгеир зыфэдэр язгъэшIэнэу, язгъэлъэгъунэу тыщэгугъышъ ары, — къыIуагъ Шъэо Аскэр. — Мы муниципальнэ образованием ипсэу­пIэ­хэм язытет, якъэбзагъэ, зэ­рэзэтегъэпсыхьагъэхэм бэкIэ ялъытыгъ цIыфэу къакIохэрэм еплъыкIэу яIэ хъущтыр, джыри зэ къагъэзэжьыщтыми, ныбжьи къэмыкIожьыщтхэми. Тиреспуб­ликэ зекIоным зыщиушъомб­гъунэу, хьакIэу къихьэрэр на­хьыбэ хъунэу, ащ ишIуагъэкIэ бюджетыми хахъохэр фэхъунхэу тыщэгугъы. Ар бэкIэ Мые­къопэ районым ыIэ илъ.

БлэкIыгъэ илъэсым къызэ­кIохэм алъэгъугъагъэм егъэ­пшагъэмэ, Iофхэр нахьышIу зэ­рэхъугъэхэр, псэупIэ койхэм япащэхэм амброзием игъэкIодын мымакIэу Iоф зэрэдашIэ- рэр зэрэнафэр Парламентым и Тхьаматэ игуадзэ къыхигъэщыгъ, тапэкIи аущтэу лъыплъэн­хэм, уц шIоир къызэрынагъэхэм ащагъэкIодыным зэрэщыгугъыхэрэми къыкIигъэтхъыгъ.

Мыекъопэ районым мэкъу­мэщ хъызмэтымкIэ и ГъэIоры­шIапIэ ипащэу Нина Самойловам къызэрэщигъэгъозагъэмкIэ, уплъэкIокIо-лъыплъэкIо къу­лыкъухэм гъатхэм къыщегъэ­жьагъэу хьасэхэр къакIухьэх, амброзием игъэкIодын Iэпэдэлэл зышIыхэрэм пшъэдэкIыжь арагъахьы, мызэу-мытIоу мыщ фэгъэхьыгъэ зэIукIэгъухэр, семинархэр зэхащагъэх.

Ащ фэдэу яIофшIэн зэрагъэлъэшыгъэр уц шIой зыхэмыт хьэсэ къабзэхэм къызэрау­шы­хьатырэр Шъэо Аскэр къыхи­гъэщыгъ. Ау етIани гъорекIо фэдэу амброзиер «къэзгъэкIы­хэрэр» джыри зэряIэхэм анаIэ тыраригъэдзагъ.

— Мыхэм хэбзэгъэуцугъэм къызэрэщыдэлъытагъэм тетэу административнэ пшъэдэкIыжь ябгъэхьын фае, — къыIуагъ ащ. — НэмыкI хэкIыпIэ щыIэп. Рес­публикэ мэхьанэ зиIэ автомобиль гъогум ыбгъукIэ аущтэу амброзиер къыIубгъакIэу зыпарэми къыпфидэщтэп. Мы уц шIоим цIыфым ипсауныгъэ зэ­рэзэщигъакъорэм имызакъоу, чIыгуми иягъэ регъэкIы. Ам­брозиер зымыгъэкIодыхэрэр комиссием изэхэсыгъо къед­гъэблэгъэщтых.

Парламентым ипресс-къулыкъу къызэрэщаIуагъэмкIэ, мы мэфэ дэдэм Шъэо Аскэр мэ­къумэщ хъызмэтымкIэ Мые­къуапэ и ГъэIорышIапIэ ипащэу Владимир Хлебниковыми Iу-кIагъ. Iоныгъо уахътэр зэрэкIуа­гъэм, бжыхьэм апхъыщтхэм чIыгухэр зэрэфагъэхьазырхэрэм ащ къыщигъэгъозагъ.

Нэужым предпринимателэу Джансух Губаз зипэщэ мэкъу­мэщ хъызмэтшIапIэм щыIагъ. Ащ зэкIэмкIи гектар 60 ыIыгъ, 32-мэ сэнашъхьэ къащагъэкIы, адрэхэми атырагъэтIысхьанэу агъэхьазырых.

Джащ фэдэу Къэралыгъо со­ветым — Хасэм ипащэ игуа­дзэ Мыекъуапэ иурамхэм ащыщыбэхэр къыплъыхьагъэх, амброзиер зэращаупкIэрэм зыщигъэгъозагъ, Горькэм ыцIэ зыхьырэмрэ Свободэмрэ азыфагукIэ урамэу Пролетарскэм щагъэ­псыгъэ скверым щыIагъ. Ахэм ащи­лъэгъугъэм ар ыгъэрэзагъ, общественнэ чIыпIэри, урамхэри зэрэкъабзэхэр, санитарнэ шапхъэхэм зэрадиштэхэрэр къы­хигъэщыгъ.