IэпыIэгъу арагъэгъоты
ЦIыфхэм ясоциальнэ фэIо-фашIэхэр зыщагъэцэкIэрэ зэхэубытэгъэ гупчэхэу муниципальнэ районхэм ащыIэхэм ахахьэу мобильнэ бригадэхэр зэхащагъэх.
Ащ хэтых социальнэ ыкIи медицинэ организациехэм яIофышIэхэр. 2020-рэ илъэсыр къызихьагъэм къыщыублагъэу мобильнэ бригадэхэм зыныбжь хэкIотэгъэ нэбгырэ 988-мэ гъогогъу 1186-рэ яфэIо-фашIэхэр афагъэцэкIагъэх.
Гузэжъогъу чIыпIэ ифагъэхэм адэжь мобильнэ бригадэр охътэ кIэкIым къыкIоцI нэсы.
Планым хэтэу бригадэм иIофышIэхэм ядэкIыгъохэм социальнэ фэIо-фашIэхэр зыфагъэцэкIэрэ унагъохэм, джащ фэдэу чIыпIэ къин ифагъэхэм, Iудзыгъэу щыс псэупIэхэм адэсхэм Iэзэгъу уцхэр афащэх, социальнэ IэпыIэгъу зищыкIагъэхэр къыхагъэщых ыкIи цIыфхэм социальнэ IэпыIэгъу языгъэгъотырэ зэхэубытэгъэ гупчэм иIофшIэн къызэрэдилъытэу нэмыкI фэIо-фашIэхэри афагъэцакIэх.
Зыныбжь хэкIотагъэхэм ыкIи сэкъатныгъэ зиIэхэм, анахьэу Iудзыгъэу щыс псэупIэхэм адэсхэм социальнэ фэIо-фашIэхэр афэгъэцэкIэгъэныр шъолъыр проектэу «Разработка и реализация системной поддержки и повышения качества жизни граждан старшего поколения «Старшее поколение» зыфиIорэм илъэныкъо шъхьаIэу щыт.
КIарэ Фатим.