IофшIапIэм щыIэу зипшъэрылъхэр зыгъэцакIэхэрэм яфитыныгъэхэм афэдэхэр яIэнхэ фае ащ пэIудзыгъэу, яунэ исхэу Iоф зышIэхэрэми — «Единэ Россием» ышIыгъэ кIэупчIэнхэм мыр язэфэхьысыжь.

IофшIэгъу мафэм икIыхьагъи, ащ ехъоу зэшIуахырэми мыр афэгъэхьыгъ.

Зэпахырэ узыкIэм зызиу­шъомбгъугъэм къыщыублагъэу къэралыгъом щыпсэухэрэм языщанэ иIахьитIу IофшIапIэм пэIудзыгъэхэу ясэнэхьат Iоф агъэцакIэ. Мы пчъагъэхэр къы­щынэфагъэх «Единэ Россием» кIэупчIэнэу ышIыгъэхэм. Ахэр икIыгъэ мазэм и 16-м къы­щыублагъэу и 23-м нэс пар-ти­ем и Тхьаматэу Дмитрий Медведевым иобщественнэ егъэблэгъапIэхэм ащырекIо­кIыгъэх, Урысыем ишъолъыр 83-мэ ащыпсэурэ нэбгырэ 7210-рэ ахэлэжьагъ.

ЗэупчIыгъэхэм япроцент 92-мэ яцыхьэ телъ пэIудзыгъэ шIыкIэкIэ Iоф зышIэрэми лэжьапIэм щыIэу зипшъэрылъхэр зыгъэцакIэрэм ифитыныгъэхэр иIэнхэ зэрэфаем. Процент 93-мэ алъытэ лэжьапкIэми къыщыбгъакIэ мыхъунэу. Процент 90-мэ къызэраIорэмкIэ, IофшIэгъум къыхимыубытэрэ уахътэм пэIудзыгъэ шIыкIэкIэ Iоф зышIэ­рэр шъхьафитын фаеу, джыри процент 91-мэ къызэрэхагъэщы­рэмкIэ, пэIудзыгъэу Iоф зышIэ­рэр ежь иунэе уахътэм къыриубытэу бгъэлажьэ зыхъукIэ, лэжьэпкIэ тедзэ ептын фае. ЗэупчIыгъэхэм япроцент 87-мэ яцыхьэ телъ иунэ имысэу сыд фэдэ чIыпIи IофышIэм ипшъэрылъхэр зэрэщигъэцэ­кIэшъущтым, зыщылэжьэщт чIы­пIэр IофшIэн езыгъэгъотырэм зэтыригъэпсыхьан фаеу процент 78-мэ алъытэ.

IофшIэнымкIэ кодексым гъэтэрэзыжьынхэр ятIонэрэ хэп­лъэгъумк1э фашIыхэ зыхъукIэ, мы ушэтыным изэфэхьысыжьхэр къыдыхалъытэщтых.

«Ушэтынымрэ зэупчIыгъэхэм яшIоигъоныгъэхэмрэ партием и Тхьаматэу Дмитрий Медведевымрэ IофшIэнымкIэ хэбзэгъэу­цугъэхэм зэхъокIыныгъэхэр афэ­зышIыщт IофшIэкIо купымрэ аIэкIагъэхьащтых тапэкIэ къыз­фагъэфедэнхэм пае», — къы­Iуагъ «Единэ Россием» игенеральнэ совет цIыфхэм зыкъызэрафагъазэхэрэмкIэ икомиссие итхьаматэу Жанна Одинцовам.

«IофшIэнымкIэ хэбзэгъэуцугъэм тапэкIэ Iоф джыри дэшIэгъэн фае, — елъытэ «Единэ Россием» и Адыгэ шъолъыр къутамэ исекретарь игуадзэу, партием ишъолъыр гъэцэкIэкIо комитет ипащэу АфэшIэгъо Рэ­мэзан. — ПэIудзыгъэ IофшIэным хэщэгъэ анахь цIыфыбэмэ яшIошI зэгъэшIэгъэным пае IофшIэнымкIэ кодексым гъэтэрэзыжьынэу афашIыщтхэм Адыге­им игъэкIотыгъэу щатегущыIагъэх. Мы Iофыгъом фэгъэхьыгъагъэх цIыфхэм яегъэблэгъэнэу зэхэтщагъэхэри. АР-м и Къэралыгъо Совет — Хасэм «Единэ Россием» ифракциеу хэтыми гъэтэрэзыжьынхэм щатегущы­Iагъэх ыкIи яшIошIхэр къыра­IотыкIыгъэх. Коронавирусым зызэриушъомбгъурэр ыкIи Iоф­шIэным къызэрэкIичырэр нахь кIэзыгъэнчъэу зэпытчынхэм пае непэ мэхьанэшхо иI лъэныкъо пстэури зэдегъэштэгъэным. ЦIыфхэу пэIудзыгъэу лажьэхэрэм IофшIэнымкIэ яфитыныгъэхэр ухъумэгъэнхэм пае шIыкIэу щыIэ пстэури къыдэлъытэгъэн фае. Ары IофшIэнымкIэ кодексым хахъохэр фэшIыгъэнхэм иIофыгъо къызкIэуцурэр, тызыхэт уахътэм кIэдгъэхьаным пае».

Шъугу къэдгъэкIыжьын, мэкъуогъу мазэм «Единэ Россием» IофшIэнымкIэ кодексым пэIудзыгъэ IофшIэным ехьылIэгъэ гъэтэрэзыжьынхэр фэшIыгъэнхэм фэгъэхьыгъэу Къэралыгъо Думэм зыфигъэзэгъагъ. ГущыIэм пае, унэм исэу зиIоф зыгъэцакIэрэм унэе уахътэ иIэным ифитыныгъэ, электрон тхылъ къегъэкIокIыныр нахь къызэрыкIо шIыгъэным, лэжьапIэмрэ унэмрэ Iоф щызадэшIэным илъэкI ащ къыхеубытэх. Хэбзэгъэуцугъэм ипроект апэрэ еджэгъумкIэ аштагъ.