Iахьзэхэлъ обществэхэу «Форест» ыкIи «Предгорье» зыфиIохэрэр коронавирусэу мэзэ пчъагъэрэ дунаир зэлъызыIыгъым ебэныгъэным къыхэмылажьэхэу щытхэп. Мы узыр къызэкIугъэхэм игъом IэпыIэгъу ягъэгъотыгъэным имэхьанэ зэрэиныр къыдыхалъытэзэ, зигугъу къэтшIыгъэ хъызмэт­шIапIэхэм япащэхэм зэпахырэ узхэмкIэ Адыгэ Республикэ сымэджэщыр Адыгеим имэз хъызмэт къыдэгъэкIакIохэм я Союз зэрелъэIугъэр агъэцэкIагъ — компьютер томографэу «General Electrik» зыфиIорэр арагъэгъотыгъ.

Пандемием илъэхъан оборудованиер ращэфынэу сомэ миллиони 10 афатIупщыгъ. Томографэу ащэфыгъэм ыкIи сымэджэщым имылъку хагъэхьагъэм ишIуагъэкIэ COVID-р къызыхагъэщыгъэхэм ­игъом ятхьабылхэр ауплъэкIунхэ алъэкIыщт ыкIи ­ягъэхъужьынкIэ ищыкIэгъэ фэIо-фашIэхэр арашIы­лIэщтых.

Ащ нэмыкIэу Iахьзэхэлъ обществэу «Форестым» мы илъэсым сомэ миллион 1,5-рэ фитIупщыгъ Мые­къопэ районым игупчэ сымэджэщ хирургиемкIэ иотделение медицинэ Iэмэ-псымэхэр рищэфынхэм фэшI. Мы отделением иигъэкIотыгъэ гъэцэкIэжьынхэм апэIухьащт мылъкур къытыгъ Iахьзэхэлъ обществэу «Предгорье» зыфиIорэми. Ар сомэ миллиони 3,5-рэ зэрэхъурэр.

Мэз хъызмэтым щылажьэхэрэм IофышIоу зэрахьэхэрэр джыри лъагъэкIотэщт.