Гъэмафэр цIыфхэр анахь зажэхэрэ уахътэхэм ащыщ. Зыгъэпсэфы­гъор ащ тефэ ыкIи илъэсрэ бэмэ зыфагъэхьазыры — яуахътэрэ ямылъкурэ елъытыгъэу зыдэкIощтхэри агъэнафэ.

Мыгъэ мы зэпстэури къэзыгъэхьылъагъэр узэу дунаим къыщежьагъэр ары. Ау джырэ уахътэм гъунапкъэхэм ащыщ­хэр къызэIуахыжьыгъэх ыкIи цIыфхэм агъэнафэщтыгъэр къыз­дагъэхъуным пылъых.

Гъэмэфэ зыгъэпсэфыгъом щыщ Iахь IэкIыбым щыжъугъакIо шъушIоигъомэ, ар шъоркIэ щынэгъончъэным тегъэпсыхьагъэу Роспотребнадзорым шъунаIэ зытежъугъэтын фаехэр къыгъэнэфагъэх. Ахэр жъугъэ­федэх къиныгъохэм шъуахэмыфэ шъушIоигъомэ:

— къэралыгъоу шъуздэкIонэу жъугъэнафэрэм эпидемиологиемкIэ изытет апэ зэжъу­гъашIэ. Ащ ихьэхэрэм агъэ-цэ­кIэн фаеу къафаIэтыхэрэм шъуащыгъуазэмэ нахьышIу;

— билетхэмрэ шъузщыпсэущтымрэ охътабэ иIэу пэшIо­рыгъэшъэу къяшъумгъэгъан — шъузщыкIощтым мэфэ зытIущ нахь имыIэжьэу ар зэшIошъу­хымэ нахьышIу;

— социальнэ зэпэчыжьэныгъэр сыдигъокIи жъугъэцакIэ — транспортым шъуитIысхьа­гъэми, паспортхэр зыщауплъэ­кIухэрэ чIыпIэми...

— хьакIэщ бизнесым пылъхэм яофициальнэ лIыкIохэм номерхэр къяжъугъэгъанэх. Хостелхэм, унэе псэупIэхэм/фэтэрхэм шъуакъыщымыуцумэ на­хьышIу;

— шъуиномер е зэIухыгъэ чIыпIэхэм шъуащышхэным шъу­пылъ. Псэушъхьэ Iэлхэм ял шъумышх. Зыгорэм ихьакъу-­шыкъукIэ е дэеу тхьакIыгъэмкIэ шъумышх;

— ащ фэдэ зэшIокI шъуиIэмэ, таксикIэ шъузекIомэ на­хьышIу, общественнэ транспортым зыщышъудзый;

— къэбзэныгъэм ишапхъэхэр жъугъэцакIэх. СабынкIэ шъуIэхэр нахьыбэрэ шъутхьа­кIых, анахьэу общественнэ чIы­пIэхэм шъуащыIэ зыхъукIэ. Ащ фэдэ амал щымыIэмэ, антисептикхэу процент 60-м мы­нахь макIэу спирт зы­хэтхэр жъугъэфедэх. Iэ шIойкIэ шъуIупэ, шъупэ, шъунэхэм шъуанэмыс;

— цIыфхэу псыхэрэм, пскэ­хэрэм защыжъудзый;

— общественнэ чIыпIэ пстэуми нэIурыхъохэр ащыжъугъэфедэх, ахэр пэшIорыгъэшъэу шъущэфых, сыда зыпIокIэ чIыпIэхэм ащыщхэм ахэр гъоты­гъуае къыщышъуфэхъунхэ алъэ­кIыщт;

— узым инэшанэ горэ шъуи­Iэу шъузэгуцэфэжьымэ, шъор-­шъорэу шъузэмыIэзэжьэу ар зисэнэхьатым зыфэжъугъаз.

Къэбарыр хэутыным­ къыфэзыгъэхьазырыгъэр МэщлIэкъо Саид.