Гъомылапхъэхэр къыщэфын зыщимылъэкIыщт чIыпIэм цIыфыр имыу­цоным пае хахъо анахь макIэм чIыфэр хамыубытыкIыным тегъэ­псыхьэгъэ законопроектхэр партиеу «Единэ Россием» къыгъэхьазырыгъэх.

«Къэралыгъом чIыпIэ къин итхэр къыухъумэнхэ фае», — къыIуагъ «Единэ Россием» и Генеральнэ совет исекретарэу Андрей Турчак. «Зы лъэныкъомкIэ, цIыфхэм ясоциальнэ фэныкъуагъэхэр гъэцэкIагъэ зэрэхъущтхэм игугъапIэ ащ къеты. НэмыкI лъэныкъомкIэ, чIыфэт учреж­дениехэу, анахьэу микрофинанс организациехэу, процентышхо зытелъ чIыфэхэр зытыхэрэр ащ зыгорэм ригъэгу­пшысэщтых», — хигъэунэфыкIыгъ Андрей Турчак.

УрыпсэунымкIэ ахъщэ анахь макIэу агъэнэфагъэм фэдизыр мазэкIэ зэрылъыщт счетыр чIыфэ зытелъхэм къаIомэ, ащ чIыфэр хамыгъэкIынэу законопроектхэм арытхагъ.

«ЦIыфхэм хэхъо анахь макIэу яIэр къэухъумэгъэн, уры­псэу­нымкIэ ахъщэ анахь макIэу агъэнэфагъэр къафэгъэ­нэжьыгъэн фае», — къыIуагъ «Единэ Россием» ифракциеу Къэралыгъо Думэм щыIэм ипащэ иапэрэ гуадзэу Андрей Исаевым. Пенсионерхэм, сэкъат­ныгъэ зиIэхэм ыкIи нэ-мыкI цIыф купхэу социальнэу дэеу ухъумагъэхэм язакъоп за­конопроектыр зытегъэпсы­хьа­гъэр. Унэе предпринима­тель­­хэ­ми, ежь-ежьырэу зиIоф­хэр зэпызыгъафэхэрэми ар алъэIэсы.

Министерствэхэм ягъусэу партием къыгъэхьазырыгъэ документым Урысыем IофшIэнымкIэ ыкIи социальнэ ухъу­мэнымкIэ и Министерстви, юстициемкIэ и Министерстви, хьыкумышI приставхэм я Федеральнэ къулыкъуи, Урысыем и Банки, профсоюзхэм яфедерации къыдырагъэштагъ. Урысыем экономикэ хэхъоныгъэмкIэ и Министерствэ Правительствэм мы законопроектымкIэ изэфэхьысыжьхэр къыгъэхьазырыщтых. Ащ итегущыIэн хэлэжьагъэхэм щыкIэгъэ заулэу къыхагъэщыгъэхэр ыужкIэ законопроектым Iоф дашIэжь зыхъукIэ дагъэзыжьыщтых. Ве­домствэхэм ялIыкIохэр зыхэ­хьащт купэу «Единэ Россием» зэхищэщтым шышъхьэIум ыкIэ­хэм яхъулIэу ар къыгъэхьазырын фае.

ЗэIукIэгъум икIэуххэм къа­те­гущыIэзэ, Андрей Турчак хи­гъэунэфыкIыгъ законопроектым итегущыIэн «Единэ Россием» шъолъырхэм зэращызэхищэрэр. Къэралыгъо Думэм ибжы­хьэ сессие документым щыдэ­ла­жьэхэ зыхъукIэ, ведомствэхэм предложениеу къахьыгъэхэр къызэрэдалъытэщтхэри ащ ­къыIуагъ.