Адыгэ Республикэм и ЛIы­шъхьэу КъумпIыл Муратрэ къэралыгъо мылъкум игъэIорышIэнкIэ Федеральнэ агентствэм и Шъолъыр чIыпIэ гъэ­Iо­рышIапIэу Краснодар краим ыкIи Адыгэ Республикэм ащы­Iэм ипащэу Сергей Маркевич­рэ АР-м и Правительствэ зычIэт унэм тыгъуасэ IофшIэгъу зэIукIэгъу щызэдыряIагъ.

Ащ хэлэжьагъэх АР-м ипремьер-министрэ игуадзэу Сапый Вячеслав, АР-м мылъку зэфыщытыкIэхэмкIэ и Комитет ипащэу Ирина Бочарниковар, АР-м имэз ГъэIорышIапIэ ипащэу Былымыхьэ Рэщыдэ.

Адыгеим и ЛIышъхьэ Сергей Маркевич фэгушIуагъ чIыпIэ гъэIорышIапIэм ипащэ зэрэфа­шIыгъэмкIэ ыкIи мылъку зэфыщытыкIэхэм алъэныкъокIэ къэралыгъо пшъэрылъхэм язэшIохын зэгъусэхэу дэлэжьэнхэм мэхьанэшхо зэриIэр къыхигъэщыгъ.

«ШIуагъэ къэзытыщт зэдэлэ­жьэныгъэ гъэпсыгъэным Адыгеир сыдигъокIи фэхьазыр. Къэралыгъо мылъкум игъэIорышIэн­кIэ Федеральнэ агентствэм Iоф­­шIэнымкIэ зэфыщытыкIэ дэ­гъухэу республикэмкIэ мэхьанэ ин зиIэ упчIэхэм ядэгъэзы­жьын къэзыгъэпсынкIагъэхэр дытиIэх. Сицыхьэ телъ тапэкIи гъэIоры­шIапIэр тигъусэу федэ къытэу шъолъырым къэралыгъо мылъкур зэрэщыдгъэзекIощтым», — къыIуагъ КъумпIыл Мурат.

Сергей Маркевич иджэу­апыгъ шъолъырым зигъоу къыщытэ­джырэ IофыгъохэмкIэ хэбзэгъэу­цугъэм къызэрэщыдэлъытагъэу, Адыгеим икъэралыгъо къулы­къухэм ягъусэхэу Iоф ашIэным зэрэфэхьазырхэр.

«IэнатIэм сызыIухьагъэм ыуж апэрэу Адыгеим сыкъэкIуагъ. Къэралыгъо мылъкум игъэIорышIэнкIэ бэ Iофэу тапэ илъыр. Лъытэныгъэ зыфэсшIэу Мурат Къэралбый ыкъу, о уиIэпыIэгъу­кIэ, шъолъырым игъэцэкIэкIо хабзэ икъулыкъухэу тиIофшIэн епхыгъэхэри тигъусэхэу упчIэу къэуцурэ пстэури зэхэтфыщт ыкIи зэшIотхыщт», — къыIуагъ Сергей Маркевич.

Адыгеим и ЛIышъхьэ къыкIигъэтхъыгъ къэралыгъо мылъкур нахь тэрэзэу гъэфедэгъэныр пшъэрылъ шъхьаIэхэм зэращыщыр: республикэм исоциальнэ лъэныкъо тегъэпсыхьэгъэ унэхэм ащыщхэр федеральнэ мэхьанэ зиIэхэм къахэщыжьыгъэ­хэу шъо­лъырым имылъку хэгъэ­хьэгъэнхэр.

Джащ фэдэу зэIукIэгъум илъэ­хъан зытегущыIагъэхэм ащыщых мэз хъызмэтым иIофшIэн, Нэгыежъ къушъхьэ чапэм ичIыгу Iахьэу Мыекъуапэ къыпэIу­лъым истатус зэблэхъугъэныр ыкIи зекIо чIыпIэу «Мэздахэр» гъэ­псыгъэным пае ар муниципальнэ псэупIэм хэгъэхьажьыгъэныр.

АР-м и ЛIышъхьэ ипресс-къулыкъу