Урысые политическэ партиеу «Единэ Россием» ишъолъыр къутамэ и Cекретарэу, АР-м и ЛIы­шъ­хьэу КъумпIыл Мурат партием ичIыпIэ отделе­ниехэм ясекретарьхэм зэIукIэгъу адыриIагъ. Пар­тийнэ проектхэм ягъэцэкIэн зэрэзэшIуахырэм ар фэгъэхьыгъагъ.Зэхэсыгъор къызэIуихызэ лIы­шъхьэм къыхигъэщыгъ «Единэ Рос­сиер» зикIэщэкIо федеральнэ проектхэр Адыгеим чанэу зэрэ­щызэшIуахыхэрэр. Ахэр мэхьанэшхо зиIэ лъэныкъохэм атегъэ­псы­хьагъэх ыкIи цIыфхэм ящыIакIэ нахьышIу шIыгъэным фэлажьэх.

«Федеральнэ гукъэкIхэм тапа­шъхьэкIэ къызэIуахырэ лъэкIхэр шIуагъэ къатэу дгъэфедэным тыпылъ. Федеральнэ мылъкур шэп­хъэшIухэм адиштэу къызфэдгъэ­IорышIэным мэхьанэшхо иI. «Единэ Россием» ипартийнэ проектхэр республикэм ихэхъоныгъэкIэ, цIыф­хэм ящыIакIэ нахьышIу шIыгъэнымкIэ IэпыIэгъу тедзэ хъунхэ фае», — къыIуагъ КъумпIыл Мурат.

Адыгеим партийнэ проект 15 щагъэцакIэ. Ахэм ащыщых «Къэлэ щыIакI», «КIэлэцIыкIу спортыр», «ТичIыгу икультур» зыфиIохэрэр. Республикэм и ЛIышъхьэ партием ичIыпIэ къулыкъухэм япащэхэм къяджагъ спортым, зыгъэпсэфыпIэхэм, псэупIэхэм ячIыналъэ, нэ­мыкIхэр зэтрагъэпсыхьэхэ зы­хъукIэ цIыфхэм яшIошIхэр къыда­лъытэнхэу. «Партийнэ программэхэм афэгъэхьыгъэу цIыфхэм ашIэн къо-дыеу щымытэу, «Единэ Россием» къырихьыжьэрэ зэхъокIыныгъэ­шIухэм язэшIохыни къыхэгъэлэжьэгъэнхэ фае. Мыр Iоф хэушъхьа­фыкIыгъэу зикIэух республикэм щыпсэурэ пэпчъ ищыIакIэ зэблэзыхъущтыр ары, ау зыхъукIэ, уп­чIэжьэгъу пшIыхэзэ ар зэшIопхын фае», — зэдэгущыIэгъум зэфэ­хьысыжь къыфишIыгъ Адыгеим и ЛIышъхьэ.

АР-м и ЛIышъхьэ ипресс-къулыкъу