Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ сабыйхэу зыныбжь илъэси 3 — 7-м къыхиубытэхэрэм мазэ къэс ахъщэ IэпыIэгъу аратынымкIэ IофшIэныр лъегъэкIуатэ.

Зы нэбгырэр зэрэпсэун ылъэ­кIыщт ахъщэу тишъолъыр ща­гъэнэфэгъэ сомэ 9474-м шIомыкIэу зиунагъо къихьэрэм мы ахъщэ IэпыIэгъур (ны-тыхэм язырэм) тефэ.

Мы илъэсым мазэ къэс аратырэ ахъщэ IэпыIэгъур зыфэдизыр сомэ 4799-рэ.

2020-рэ илъэсым бэдзэогъум и 27-м ехъулIэу IофшIэнымкIэ ыкIи цIыфхэр социальнэу къэу­хъумэгъэнхэмкIэ учреждениехэм лъэIу тхылъ 21059-рэ къаIэкIэ­хьагъ, ащ щыщэу — 16558-м ахэплъагъэх. ЛъэIу тхылъ 8534-мэ атегъэпсыкIыгъэу сабый 11043-мэ ахъщэ IэпыIэгъур афагъэнэфагъ. Мыщ сомэ миллион 310-рэ мин 64-рэ пэIуагъэ­хьагъ.

ШъузыгъэгумэкIырэ упчIэхэмкIэ министерствэм зыфэжъугъэ­зэн шъулъэкIыщт: 8(8772)57-05-28-рэ, 52-18-86-рэ. ЦТСЗН-м 8(8772) 52-57-80-рэ, 52-31-99-рэ, 52-22-07-рэ.