Зэпахырэ узэу дунаир зэлъызыкIугъэм зимыушъомбгъуным пае зи­Iоф­­шIэн къызэтезгъэуцогъагъэхэм ащыщых спортым епхыгъэ учреж­де­ниехэри. Пстэумэ аужэуи ахэр къызэIуахыжьыгъэх.

Уахътэм къызэригъэлъэгъуагъэмкIэ, мэзэ зытIущым спорт еджапIэхэм, залхэм, клубхэм Iоф замышIэм нэбгырабэ ащы­сэхъукIыжьыгъ. ХэшIыкI фызиIэхэм къызэраIорэмкIэ, спортым чIэнагъэхэр ышIынхэм, кIэлэцIыкIухэр, ныбжьыкIэхэр пымылъыжьынхэм ищынагъо щыIэ хъугъэ.

Джы ар зыпкъ иуцожьы­нымкIэ тренерхэм чаныгъэ къы­зэрэзыхагъафэрэм имыза­къоу, спортивнэ инфраструктурэм изытети мэхьанэ иI. Ау ащ игъэпсын администрацие- хэм ямызакъоу, общественнэ лъэныкъом фэгъэзагъэхэри къы­хэлэжьэнхэ фае.

ГущыIэм пае, Урысые политическэ партиеу «Единая Россия» зыфиIорэр пштэмэ, ащ исатыр хэтэу зэлъашIэрэ фигуристкэу, Къэралыгъо Думэм идепутатэу, «Детский спорт» зыфиIорэ проектым икоорди­наторэу Ирина Роднинар кIэлэцIыкIу спортым изегъэушъомбгъун лъэшэу пылъ. Проектым ипшъэрылъ шъхьаIэр цIыфхэм яшIоигъоныгъэхэмрэ хабзэм иамалхэмрэ зэтыригъэфэнхэр ары. Спорт псэуалъэу ашIыщтым пае тхылъхэм ягъэхьа­зы­рын къыщыублагъэу, ар агъэу­цоу атIупщыфэкIэ лъыплъэгъэныри зэу ахэм ащыщ.

Мары мы тызыхэт илъэсым гъэсэныгъэм иорганизацие 1100-м ехъу проектым хэлажьэ. Ахэм спортзалхэр аща­гъэкIэжьыщтых, зэIухыгъэ спорт площадкэхэм ящыкIагъэр ащагъэуцущт, клуб къызщызэIуа­хыщтхэри ахэтых. Урысыем исубъект зэфэшъхьафхэм физкультурэм щыпылъынхэу, япсау­ныгъэ ащызэтырагъэуцожьынэу комплекси 10 ащагъэуцущт. Ахэм сомэ миллиард апаIуа­гъэхьан гухэлъ яI.

Джащ фэдэу зэIухыгъэу спорт площадкэ 35-рэ агъэпсыщт.

2019 — 2020-рэ илъэсхэм спортивнэ инфраструктурэм пае партием ипроектхэу «Детский спорт» ыкIи «Новая школа» зыфиIохэрэм яшIуагъэкIэ субъектхэм сомэ миллиарди 8 афэкIуагъэ хъугъэ.

— Специалистхэм къызэра­IорэмкIэ, кIэлэеджакIоу гурыт еджапIэхэм ачIэсхэм япро­центи 10 — 15-р ары ныIэп псауныгъэ дэгъу зиIэр. А лъэны­къомкIэ Iофхэр нахьышIу шIыгъэнхэм УФ-м и Правительстви, партиеу «Единэ Россиери» лъэшэу ыуж итых, — къы­Iуагъ АР-м и Къэралыгъо Совет — Хасэм идепутатэу, НыбжьыкIэ парламентым и Тхьаматэу, «Детский спорт» зыфиIорэ проектым икоординаторэу Джастэ Вячеслав. — Мы проектыр Урысыем, Адыгеири зэрахэтэу, спортивнэ инфраструктурэм хэхъоныгъэхэр щи­шIынхэм егъэжьапIэ фэхъугъ. Мары тиреспубликэ спорт псэо­лъэ зэфэшъхьафыбэ кIэу ща­шIыгъ, еджапIэхэм стадионхэр ащагъэпсыгъэх, спортзал пчъагъэ гъэкIэжьыгъэ хъугъэ.

Тэхъутэмыкъое районым изакъоу аужырэ илъэс зытIум спорткомплекситIу, атлетикэ он­тэгъумкIэ зыщагъасэхэрэ за­лышхо, нэмыкI псэуалъэхэр зэрэщашIыгъэхэр, еджапIэхэм ащыщыбэхэм стадионхэр зэ­ращагъэпсыгъэхэр депутатым щысэу къыхьыгъ.

Мы уахътэм районым кIэлэцIыкIу спорт еджэпIи 4-мэ Iоф щашIэ. Ахэм спорт лъэпкъ зэфэшъхьаф 16-кIэ кIэлэцIыкIу нэбгырэ 1800-м ехъумэ защагъасэ. Бастэ Вячеслав къы- зэриIуагъэмкIэ, мы еджапIэхэм къачIахьэхэрэм япчъагъэ илъэс къэс хэхъо. ГущыIэм пае, 2016-м нэбгырэ 1550-мэ за­щагъасэщтыгъэмэ, 2019-м ар 1867-м нэсыгъ.

КIэлэцIыкIухэм япсауныгъэ гъэпытэгъэным пае спорт псэуа­лъэхэр нахьыбэ шIыгъэнхэм фэгъэпсыгъэ стратегиеу «Единэ Россием» къыхихыгъэр зэрэтэрэзыр уахътэм къызэригъэлъэгъуагъэм къыкIигъэтхъызэ, тапэкIи ар лъыгъэкIотэ­гъэным мэхьанэ зэриIэр депутатым къыIуагъ.