«Боспор къыщыублагъэу Каспий нэс»
Ащ фэдэ шъхьэ зиIэ автомобиль экспедицие икIыгъэ мазэм и 27-м Краснодар щаублагъ. Ащ хэлажьэхэрэр блэкIыгъэ зыгъэпсэфыгъо мафэхэм Адыгеим къэсыгъэх.
ШышъхьэIу мазэм и 2-м экспедицием пэгъокIыгъэх Урыс географическэ обществэм и Адыгэ шъолъыр къутамэ илIыкIохэр. Ащ ипащэу Игорь Огай Адыгеим фэгъэхьыгъэу къафиIотагъ, ичIыпIэ гъэшIэгъонхэм, итарихъ, шэн-хабзэхэм, зекIоным зызэрэщиушъомбгъурэм ащигъэгъозагъэх. Аммонитхэм якIэй, псэупIэу Каменномостскэм исп унэу дэтым, Мэщыкъо тIуакIэм хьакIэхэр яблэгъагъэх.
Игорь Огай къызэриIуагъэмкIэ, экспедицием пшъэрылъэу иIэхэр зекIоным зегъэушъомбгъугъэныр, цIыфхэу сэкъатныгъэ зиIэхэми ар атегъэпсыхьагъэу шIыгъэныр арых. Джащ пае хэушъхьафыкIыгъэ автомобильхэу «LADA-Largus» зыфиIохэу шъолъыр зэикIхэмрэ къушъхьалъэхэмрэ бэрэ уащызекIоным фэгъэшIыгъэхэм арысхэу ягъогу къакIу.
«Сэкъатныгъэ зиIэхэр гъогу тепщэнхэр, ахэм къябгъэкIухьаныр Iоф псынкIэп, ау зэшIомыхышъунэу щытэп. Мы гупшысэмкIэ къотэгъухэр уиIэхэу узэдэлажьэмэ, джы зэрэтшIыгъэм фэдэу, къыбдэхъущт. Зидунай зэжъу хъугъэхэм яIэрыфэгъущт тичIыопс ибаиныгъэ, титарихъ, тикультурэ ахэщэгъэнхэр. Мы автомобильхэм афэдэхэр щыIэхэ зыхъугъэм къыщыублагъэу амали щыIэ мэхъу зекIонымкIэ яхъопсапIэхэр къадэхъунэу», — аIо зэхэщакIохэм.
Адыгеим къэмыкIохэзэ Iофтхьабзэм хэлажьэхэрэр Краснодар краим щыIагъэх, ирайон зэфэшъхьафхэм зэлъашIэрэ чIыпIэхэу арытхэр зэрагъэлъэгъугъэх.
ЗэкIэмкIи ягъогууанэ икIыхьэгъэщтыр километрэ 3700-рэ, мэфэ 22-кIэ ар къакIущт. Краснодар краим, Адыгэ Республикэм, Ставрополь краим, Къэрэщэе-Щэрджэсым, Къэбэртэе-Бэлъкъарым, Темыр Осетием — Аланием ыкIи Ингушетием апхырыкIыщтых. Экспедициер Владикавказ шышъхьэIум и 16-м щаухыщт.
Ар апэрэу зэхащэ ыкIи зыфэгъэхьыгъэр Урыс географическэ обществэр загъэпсыгъэр мыгъэ илъэси 175-рэ зэрэхъурэр ары.