КIэлэцIыкIухэм ыкIи ныбжьыкIэхэм янаучнэ-техническэ творчествэ и Дунэе фестивалэу «От Винта» зыфиIорэр 2005-рэ илъэсым къыщегъэжьагъэу зэхащэ.

Урысыем иныбжьыкIэ къэу­гупшысакIохэм, ныбжьыкIэ площадкэхэм ыкIи хэбзэ къулы­къухэм ялIыкIохэм, хэхъоныгъэм­кIэ институтым, предприятие ыкIи егъэджэн учреждение анахь дэгъухэм япроектхэм якъэгъэлъэгъон мы Iофтхьабзэр фэIорышIэ.

Фестивалым пшъэрылъэу иIэр ныбжьыкIэхэм ятехническэ шIэныгъэхэм ахэгъэхъогъэныр, аныбжь емылъытыгъэу ятехнологическэ проектхэр щыIэны­гъэм щыпхыращынхэр, ныбжьыкIэхэм къаугупшысыгъэ проектхэр промышленнэ производствэм щыгъэфедэгъэнхэр ыкIи шIэныгъэу аIэкIэлъхэмкIэ зэхъо­жьынхэр ары.

2019-рэ илъэсым шъолъыр 75-мэ къарыкIыгъэ ныбжьыкIэхэр Iофтхьабзэм хэлэжьа­гъэх. 2020-рэ илъэсым промышленностым ылъэныкъокIэ научнэ-техническэ амалэу яIэхэм ахагъэхъонымкIэ ныбжьыкIэ къэугупшысакIохэр, конструкторхэр, акъылышIо кIэлэ­еджа­кIохэр чанэу къыхэгъэлэжьэгъэн­хэр япшъэрылъ шъхьаI.

Iофтхьабзэм рагъэблагъэх кIэлэеджакIохэр, студентхэр ыкIи ныбжьыкIэ специалистхэу зыныбжь илъэс 35-м емыхъугъэхэр. ХэушъхьафыкIыгъэ ыкIи куп егъэджэнхэр Iофтхьабзэм къыдыхэлъытагъэх. Командэм ныбжь зиIэхэри хэхьанхэ алъэ­кIыщт. IофшIэныр зыфэгъэхьыгъэщтыр авиациер, космонавтикэр, ракетэм, къухьэм, роботым яшIын, социальнэ предпринимательствэр ыкIи нэмыкI лъэныкъохэр арых.

Мыщ фэгъэхьыгъэ игъэкIотыгъэ къэбарыр сайтэу: http:// otwinta.com зыфиIорэм ижъугъотэщт.