Онлайн шIыкIэм тетэу рекIокIыщт
2020-рэ илъэсым шышъхьэIум и 10-м къыщегъэжьагъэу и 26-м нэс я XI-рэ ныбжьыкIэ форумэу «Мэщыкъу» зыфиIорэр апэрэу онлайн шIыкIэм тетэу зэхащэщт.
Форумым и Интернет-платформэ хэбзэ егъэджэн ыкIи культурнэ кIэнхэм якъэухъумэн зэрэфэIорышIэрэм имызакъоу мы Iофтхьабзэм ныбжьыкIэхэр нахьыбэу хэлэжьэнхэмкIэ амал дэгъухэр къаретых.
Илъэс 18-м къыщегъэжьагъэу 30-м нэс зыныбжьхэу шIоигъоныгъэ зиIэхэр зэкIэ форумым хэлэжьэнхэ алъэкIыщт. Ащ пае АИС «Молодежь России» зыфиIорэм лъэIу тхылъ атын фае.
Форумым хахьэу узыгъэгъозэрэ лекциехэм къафеджэщтых, зэлъашIэрэ цIыфхэм аIуагъэкIэщтых, яшIэныгъэхэм ахагъэхъонымкIэ егъэджэнхэр афызэхащэщтых. Илъэс ренэм цифрэ шIыкIэм хэхъоныгъэ егъэшIыгъэным, ныбжьыкIэхэм язэпхыныгъэ шIуагъэ къытэу гъэпытэгъэным форумыр фэIорышIэщт.
«Карьерная мастерская» зыфиIорэ онлайн-площадкэм хахьэу форумым хэлажьэхэрэр Темыр-Кавказ федеральнэ шъолъырым иIофышIэ анахь дэгъухэм аIуагъэкIэщтых, социальнэ проектированием ылъэныкъокIэ яшIэныгъэхэм ахагъэхъощт. Джащ фэдэу проектхэм якъэугупшысынкIэ зэнэкъокъум, IофшIапIэ зэрагъэгъотынымкIэ ермэлыкъхэм ахэлэжьэнхэмкIэ форумым амалышIухэр къытыщтых.
Форумым хэлажьэхэрэм зэкIэми егъэджэн программэр зэракIугъэмкIэ сертификатхэр аратыщтых. Анахь чанэу къахэщыгъэхэм спонсорхэм яшIухьафтынхэр афагъэшъошэщтых.