КIэлэцIыкIухэм ягъэмэфэ зыгъэпсэфыгъо ижъотыпI. Чанэу а уахътэр зыгъэфедэхэрэм щынэгъончъэ гъогухэр къыхахынхэу ыкIи нахьыжъхэм ядэIунхэу омбудсменэу Александр Ивашиныр къяджэ.

Адыгеим и Къэралыгъо автоинспекцие икъулыкъу­шIэхэм кIэлэцIыкIум ифитыныгъэхэр къэухъумэгъэнхэмкIэ Уполномоченнэу АР-м щыIэ Александр Ивашиныр ягъусэу Мыекъуапэ иныбжьыкIэ лъэсрыкIохэм ыкIи кушъхьэфачъэр зикIасэхэм аIукIагъэх.

ГъогурыкIоныр щынэгъончъэным фэгъэхьыгъэ упчIэхэу кIэлэцIыкIухэм къатыгъэхэм джэуапхэр къара­тыжьыгъэх. Пстэуми зэдагъэфедэрэ зыгъэпсэфыпIэ чIыпIэхэм узэрякIолIэщт щынэгъончъэ гъогу­хэр ахэм зэрашIэрэр зэхэщакIохэм ауплъэкIугъ. Автомобильхэр зэрыкIохэрэ гъогур зэрэзэпачыщт шIыкIэр ыкIи сакъыныгъэ къызхагъэфэнэу зэрэщытыр зызгъэ­псэфынэу зикIасэхэм агу къагъэкIыжьыгъ.

ГъогурыкIоным хэлэжьэрэ ныбжьыкIэхэм шIокI имыIэу шапхъэхэр агъэцэкIэнхэу, хэбзэукъоныгъэхэр къызхамыгъэфэнхэу Александр Ивашиныр къяджагъ.