Адыгэ Республикэм и ЛIышъхьэу КъумпIыл ­Мурат къызэрэхигъэщыгъэмкIэ, шъолъырым игъогу хъызмэт хэхъоныгъэ ышIы­ным­кIэ фе­деральнэ гупчэр IэпыIэгъу къызэрэ­фэ­хъу­рэм мэхьанэшхо иI.

Федеральнэ автомобиль гъо­гухэр республикэм пхырэкIых (А-146 «Краснодар — Верхнебаканский» ыкIи М-4 «Дон»). Краснодар краимрэ Къырымрэ языгъэпсэфыгъо чIыпIэхэм якIолIэгъэнымкIэ мыхэр гъогу кIэкIэу щытых. Мы гъогухэм ащызекIорэ машинэхэм япчъагъэ илъэс къэс нахьыбэ мэхъу. Ащ къегъэлъагъо зекIоным зы­зэриушъомбгъурэр ыкIи Адыгеим рекреационнэ амалэу IэкIэ­лъыр цIыфхэм зэрашIогъэшIэгъоныр. Арышъ, гъогухэм язэтегъэпсыхьан республикэмкIэ мэхьанэшхо зиIэ лъэныкъу.

— Мы пшъэрылъыр зэшIохыгъэ хъунымкIэ амалэу тIэкIэ­лъыр зэкIэ тэгъэфедэ, федеральнэ гупчэм зэпхыныгъэ дытиI. Федеральнэ профильнэ ведомствэхэм ыкIи организациехэм зэрифэшъуашэу Iоф адэтэшIэ. Къэралыгъо компаниеу «Автодорыр» тигъусэу проект ин заулэ республикэм щытэгъэцакIэ — къуаджэу Тыгъургъойрэ поселкэу Лъэустэнхьаблэрэ адэжь щытшIырэ гъогу зэхэкIыпIэхэр. Мы проектхэр гъэцэкIэгъэнхэм мэхьа­нэшхо иI, — къыIуагъ КъумпIыл Мурат.

Компаниеу «Автодорым» къызэритырэмкIэ, поселкэу Лъэустэнхьаблэ дэжь щыIэ транспорт зэхэкIыпIэр ашIыгъах, бэдзэогъум ыкIэм ще­гъэжьагъэу ащ Iоф ешIэ. Тыгъур­гъойкIэ щашIырэри ыкIэм фэ­кIуагъ. Машинэхэр зыщыдэхынхэ алъэкIыщт чIыпIи 7-м щыщэу 5-р агъэпсыгъах. Джы Ябло­новскэ къикIыхэу (къыблэмкIэ) М-4 гъогум тетхэу Жьыубгъу лъэныкъо кIохэрэм къагъэзэ­жьыным фэшI Краснодар нэс кIонхэ ищыкIэгъэжьэп. Транспорт зэхэкIыпIэу ашIыгъакIэм ащ фэдэ амал къареты.

ГъогушIхэм зэрагъэнэфагъэм­кIэ, гъэмафэр имыкIызэ адрэ къэнэгъэ IофшIэнхэр аухыжьыщтых.

— ГъогурыкIоныр щынэгъончъэу щытыным, ащ дакIоу шъо­лъырым иэкологие шапхъэхэм адиштэным тынаIэ тедгъэтын фае. ТицIыфхэм псэукIэ амалэу яIэхэр нахьышIу шIыгъэным ыкIи Адыгеир инвестициехэмкIэ хъопсагъоу щытыным мы пстэури фэIорышIэ, — къы­хигъэщыгъ КъумпIыл Мурат.

АР-м и ЛIышъхьэ ипресс-къулыкъу