Лъэпкъ проектхэм, къэралыгъо ыкIи муниципальнэ программэхэм ягъэцэкIэн къыдыхэлъытагъэу псэуалъэ­хэм яшIын ыкIи ягъэцэкIэжьын зэрифэшъуашэу зэхэщэгъэным фэгъэзэгъэ Координационнэ штабым изэхэсыгъо тыгъуасэ щыIагъ. Видеоселектор шIыкIэм тетэу кIогъэ Iофтхьабзэм тхьамэтагъор щы­зэрихьагъ Адыгеим и ЛIышъхьэу КъумпIыл Мурат.

АР-м икъэралыгъо учреж­дениеу «Стройзаказчикым» ипащэу Абрэдж Аслъан къызэриIуагъэмкIэ, сомэ миллиарди 2,4-м ехъу зытефэрэ псэолъэ 39-мэ IофшIэнхэр ащэкIох. Апэрэ илъэсныкъом сомэ миллиард 1,1-рэ агъэфедагъ. МылъкумкIэ социальнэ мэхьанэ зиIэ учреж­дениехэр ашIых, зэтырагъэ­псыхьэх, агъэцэкIэжьых.

— ПIалъэу дгъэнэфагъэм ехъулIэу тшIырэ псэуалъэхэр зэкIэ ттынхэ фае. МыщкIэ Iоф­шIэныр зэхэщагъэ зэрэхъурэм муниципалитетхэм япащэхэри лъыплъэнхэм мэхьанэшхо иI. Коммунальнэ, гъогу ыкIи со­циальнэ объектхэр чIыпIэхэм хэхъоныгъэ ашIынымкIэ планхэм къадыхэлъытэгъэнхэ фае, — къыIуагъ КъумпIыл Мурат.

Шъолъыр проектэу «Непэрэ еджапIэр» зыфиIорэм игъэцэкIэн зэрэлъыкIуатэрэм, зэшIуа­хыгъэм ыкIи пшъэрылъхэм къа­тегущыIагъ министрэу КIэрэщэ Анзаур.

АР-м экономикэ хэхъоны­гъэмкIэ ыкIи сатыумкIэ иминистрэу Геннадий Митрофановыр промышленнэ (индустриальнэ) паркэу «Яблоновскэм» ишIын къытегущыIэзэ, непэрэ мафэм ехъулIэу инфраструктурэр зыщагъэпсыщт чIыгу гектари 193-рэ зэрагъэнэфагъэр къыIуагъ, ащ ищыкIэгъэ пстэури ращэ­лIэщт.

— ПшъэдэкIыжь зыхьыхэрэр ыкIи проектым игъэцэкIэн иедзы­гъо пэпчъ пIалъэу пылъыр къэзыгъэнэфэрэ гъогу картхэр тIэкIэлъынхэ фае. Адыге­им социальнэ-экономикэ хэхъоныгъэ ышIыным иунэе программэ мы проектыр хэхьагъ. Арышъ, паркым игъэпсын тапэкIэ шIогъэ-шхо къытын фае, — къыхигъэщыгъ республикэм ипащэ.