Балли 100 къэзыхьыгъэхэр
Мыгъэ еджапIэр къэзыухыгъэ ныбжьыкIэхэу гъэхъэгъэшIу зиIэхэм нэIуасэ шъузщафэтшIырэ едзыгъор лъытэгъэкIуатэ. Непэ тыкъызытегущыIэщтхэр Мыекъопэ гурыт еджапIэу N 7-р къэзыухыгъэхэ Хъуажъ Фаридэрэ Теуцожь Юлэрэ.
Фаридэ Адыгэ Республикэм и ЛIышъхьэ ыцIэкIэ агъэнэфэгъэ стипендиер къехьы. УрысыбзэмкIэ зыкI ушэтыныр зетым, балли 100 къыхьыгъ.
Илъэс еджэгъу зэкIэлъыкIохэм пшъэшъэ ныбжьыкIэм зыпкъитыныгъэ хэлъэу, еджэным фаблэу, мурадэу зыфигъэуцужьыхэрэр чанэу зэрэзэшIуихыщтхэм ыуж итыгъ. ГъэхъэгъэшIухэр ышIынхэмкIэ джа шэнхэр ары зишIуагъэ къэкIуагъэр. УрысыбзэмкIэ, литературэмкIэ, географиемкIэ, МХК-мкIэ зэхащэрэ олимпиадэхэм, творческэ зэнэкъокъухэм пчъагъэрэ текIоныгъэр къащыдихыгъ.
«Илъэсым икIэлэегъадж» зыфиIорэ зэнэкъокъоу 2019-рэ илъэсым щыIагъэм ишъолъыр едзыгъо жюрим хэхьэгъэ кIэлэеджакIохэм Фаридэ ахэтыгъ.
АрхитектурэмкIэ ышIыгъэ проектхэм хэшIыкI фызиIэ специалистхэм осэшIу къыфашIыгъ, мурад шъхьаIэу иIэр — архитектурэмкIэ апшъэрэ еджапIэм чIэхьаныр ары. Фаридэ зэрилъытэрэмкIэ, ЕГЭ-р зы лъэныкъомкIэ насыпым елъытыгъ, ау материалхэри дэгъоу зэрэпшIэхэрэм дакIоу угукIэ зытебгъэпсыхьан фае. ГъэцэкIэнхэм гуфаплъэу уяджэзэ, къэпшIынхэу щыт. Гъэхъагъэ пшIын зыхъукIэ зэпымыоу Iоф зыдэпшIэжьынэу щыт. Джарэущтэу зыхъукIэ Iофыр къыбдэхъущт.
Теуцожь Юлэ Адыгэ Республикэм сэнаущыгъэ зыхэлъ ныбжьыкIэхэм IэпыIэгъу афэхъугъэнымкIэ агъэнэфэгъэ ахъщэ шIухьафтыным илауреат 2018-рэ илъэсым хъугъэ. Джыри ублэпIэ классхэм ащеджэзэ, бзэхэм язэгъэшIэн ищыIэныгъэ зэрэрипхыщтыр къыгурыIуагъэу щытыгъ. Игухэлъ чыжьэ къыдэхъуным пае пшъэшъэ губзыгъэм бзэхэм язэгъэшIэн зыфищэищтыгъ, олимпиадэ зэфэшъхьафхэм ахэлажьэщтыгъ.
Инджылызыбзэр дэгъоу зэригъэшIэнымкIэ IэпыIэгъу къыфэхъугъэх еджэпIэ гупчэхэу «Актив» ыкIи «Англоклуб» зыфиIохэрэм якIэлэегъаджэхэр. Мурадэу зыфигъэуцужьхэрэм адэмыхэу лъыкIуатэхэрэм Юлэ ащыщ, творческэ цIыфэу щыт, игъэхъагъэхэм къащыуцурэп.
ЦIыф пэпчъ фэдэу ащ игъогуи пэрыохъухэр иIагъэх. Ау къыдеджагъэхэр, игупсэхэр, икIэлэегъаджэхэр къыдэIэпыIэхэзэ, ыгу амыгъэкIодэу ыпэкIэ лъыкIотэн ылъэкIыгъ. УрысыбзэмкIэ кIэухэу къыгъэлъэгъуагъэм Юлэ лъэшэу ыгъэгушIуагъ, ушэтыным зыфигъэхьазырынымкIэ кIуачIэу хилъхьагъэр хьаулые зэрэмыхъугъэр къэнэфагъ. ЕджапIэр къэзыухыгъэхэм зэкIэми ягухэлъхэр къадэхъунхэу, зыфэе сэнэхьатыр агъотынэу Юлэ афэлъаIо.
Iэшъынэ Сусан.