ЫпэкIэ тигъэзет къызэрэщыхэтыутыгъэу, бэдзэ­огъум и 15-м къыщегъэжьагъэу шышъхьэIум и 30-м нэс Къуекъо Налбый ыцIэкIэ зэнэ­къокъоу зэхащагъэм адыгабзэкIэ тхыгъэ рассказ анахь дэгъур къыщыхахыщт. Ащ ха­бзэу, шап­хъэу пылъхэм нахь игъэкIотыгъэу нэIуасэ шъуа­фэтэшIы.

Рассказ тхыным тегъэпсы­хьэгъэ адыгэ тхакIоу Къуекъо Налбый ыцIэкIэ щыт зэнэкъо­къур зэхэзыщэрэр ыкIи резыгъэкIокIырэр Хэку гъэзэжьы­нымкIэ Адыгэ Хасэмрэ (Онтарио — Канада) гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэмрэ. Зэнэкъокъум гу­хэлъ шъхьаIэу иIэр адыгабзэр лъэпкъым илэжьыгъэ анахь лъэ­пIэ дэдэхэм зэращыщым кIэлэцIыкIухэм гу лъарагъэтэныр, ащ уасэ фашIын, фэса-къын ыкIи къаухъумэн зэрэфаер къагурыгъэIогъэныр, сыд фэдэ чIыпIэ ифагъэхэми, яныдэлъфыбзэкIэ гущыIэнхэр, гу­пшысэнхэр, тхэнхэр, еджэнхэр Iофышхоу зэрэщытыр зэха­шIыкIыныр ары.

Филологие шIэныгъэхэмкIэ доктор, гуманитар ушэтынхэмкIэ Адыгэ республикэ инсти­тутым ипащэ игуадзэу Бида­нэкъо Марзият тызэрэщигъэ­гъозагъэмкIэ, мыгъэ апэрэу мыщ фэдэ зэнэкъокъу зэхащэ. Республикэм ит гурыт еджапIэхэм, гъэсэныгъэм иучреж-­де­ниехэм макъэ арагъэIугъ, ныб­жьыкIэхэр чанэу къыхэлэ­жьэнхэу мэгугъэх. Зэнэкъокъум изэхэщэн кIэщакIо фэхъугъэр профессорэу, шIэныгъэхэмкIэ докторэу, Хэку гъэзэжьынымкIэ Адыгэ Хасэм итхьаматэу СтIашъу Iyрфан ары.

— БлэкIыгъэ илъэсым конференциеу зэхэтщагъэм Къуе­къо Налбый илъэсым ицIыфэу щыдгъэнэфагъ. Зэнэкъокъур зэхэтщэным ар IэубытыпIэ фэ­хъугъ, — къытфеIуатэ Бида­нэкъо Марзият.

ЗэхэщакIохэм зэрагъэна­фэрэмкIэ, зэнэкъокъум зэфэ­хьысыжьэу фэхъунэу зыщыгугъыхэрэр адыгэ кIэлэцIыкIухэр зыщыщхэ лъэпкъым ишэн-ха­бзэхэр ашIэнхэр, сэнаущыгъэу ахэлъымрэ зэшIокIэу яIэмрэ нахь зарагъэушъомбгъузэ, ягу­пшысэ къыраIотыкIышъуныр ары. Джащ фэдэу сабыйхэм яныдэлъфыбзэ фыщытыкIэу фыряIэм нахь зыкъыIэтыным, гущыIакIэу щыIэхэм нахь щыгъозэнхэм Iофтхьабзэр фэIорышIэнэу мэгугъэх.

2020-рэ илъэсым бэдзэогъум и 15-м щегъэжьагъэу кIорэ зэнэ­къокъур Iоныгъо мазэм и 15-м нэс рекIокIыщт. Тхыгъэхэр шышъхьэIум и 30-м нэс къа­гъэхьынхэ фае. Iоф­тхьабзэр ныбжьым елъытыгъэу зэтеутыгъэщт:

— гурыт еджапIэм щеджэрэ еджакIохэу зыныбжь илъэс 14 — 17-м итхэр;

— апшъэрэ еджапIэхэм ­ачIэс еджакIохэмрэ зыныбжь илъэс 25-м нэсыгъэ ныбжьыкIэхэмрэ.

Зэнэкъокъум къагъэхьыщт тхыгъэхэр яжанрэкIэ рассказ шапхъэм илъынхэ фае. Iоф­тхьабзэм къагъэхьы хъущт ащ хэхыгъэу фагъэхьазырыгъэ тхы­гъэхэри, ыпэкIэ къыхаутыгъэ­хэри.

Тхыгъэм цIэу фашIыгъэмрэ ащ къыщыIотэгъэ гупшысэмрэ зэрэзэпэджэжьырэ, зэрэзэте­фэрэ шIыкIэр, зикъэлэмыпэ къыпыкIыгъэм гупшысакIэу иIэм имэхьанэр, гупшысэм зэкIэ­лъыкIуакIэу иIэр, ащ къыщыIэтыгъэ Iофыгъохэр зэшIохыгъэ, къэIотагъэ зэрэхъугъэм икуугъ, адрэхэм ашъхьэщыкIэу тхыгъэм хэлъ гъэшIэгъоныр, нэмыкIхэр анахь шъхьэIэщт.

Къагъэхьырэ тхыгъэхэр Word шапхъэм итэу, нэкIубгъуищым къыщымыкIэу щытын, текстым икъэуахьхэр интервалыр см 2,5-кIэ (джабгъумкIи, сэмэгумкIи, ышъхьагъыкIи, ычIэгъыкIи) къыIухыгъэн фай. Сатыр къэс интервалитIу азыфагу дэлъын фай, хьарыфым иинагъэр шрифт 14-м тетэу, Times New Roman шапхъэм итэу щы­тын фай.

ЗиIофшIагъэ къыхагъэщы­хэрэм ахъщэ шIухьафтынхэр афагъэшъошэщтых. Гурыт еджа­пIэм чIэс еджакIохэм ащыщэу апэрэ чIыпIэр зыфагъэшъо­шагъэм сомэ минипшI, ятIонэрэ чIыпIэм — сомэ минитф, ящэнэрэм — сомэ минищ аратыщт.

Апшъэрэ еджапIэхэм ачIэс ныбжьыкIэхэм ащыщэу апэрэ чIыпIэр зэратыгъэм сомэ мин тIокI фагъэшъошэщт, ятIонэрэм — сомэ минипшI, ящэнэрэ чIыпIэм — сомэ минибл.

ТекIуагъэхэмрэ нахь чанэу хэлэжьагъэхэмрэ Хэку гъэзэ­жьынымкIэ Адыгэ Хасэм къыхихыщтых ыкIи ежь иунэе мылъку къыхигъэкIыгъэ ахъщэ шIухьафтынхэр гуманитар ушэтынхэмкIэ Адыгэ республикэ институтым ащаритыжьыщтых. Джащ фэдэу зэнэкъокъум зэ­рэхэлэжьагъэхэр къэзыушы­хьатрэ тхылъхэр (сертификатхэр) зэкIэми къаратыщт. Къы­хэгъэщыгъэн фае Iофтхьабзэм щытекIуагъэхэр зыгъэхьазырыгъэ кIэлэегъаджэхэм щытхъу тхылъ зэрафагъэшъошэщтхэр.

2020-рэ илъэсым чъэпыогъу и 10-м зэфэхьысыжьхэр ашIыщтых.

Тхыгъэу къырахьылIагъэхэм яшIуагъэрэ ахэр зэнэкъокъум къыгъэуцугъэ шапхъэхэм зэ­ра­тефэрэмрэ зэхифыным фэгъэзэгъэ куп зэхащэщт. Ар зы­гъэ­нэфэщтыр гуманитар ушэтынхэмкIэ Адыгэ республикэ институтыр ары.

ТекIуагъэхэмрэ нахь чанэу хэлэжьагъэхэмрэ ятхыгъэхэр зэкIэри Хэку гъэзэжьынымкIэ Адыгэ Хасэмрэ гуманитар ушэтынхэмкIэ Адыгэ республикэ институтымрэ Интернетым къы­рагъэуцощтых. Ахэм анэмыкIэу гъэшIэгъонэу, шIуагъэ зиIэу къа­гъэхьыгъэ тхыгъэхэри къыхагъэщыщтых. Къэбархэр гъэзетхэм, телевидением, радиом къатыщт.

Конкурсым хэлэжьэщтхэм ятхыгъэхэр Email-у edu@CROWorld.org marziyatbidanok@mail.ru къагъэхьынхэу къяжэх. Ащ «Зэнэкъокъоу Къуекъо Налбый ыцIэкIэ рекIокIырэм пай» тетын фай. НыбжьыкIэхэм зыщагъэгъупшэ хъущтэп тхыгъэхэр зикъэлэмыпэ къычIэкIы­гъэхэм атефэрэ къэбар кIэкI шапхъэм итэу къагъэлъэгъон зэрэфаер.

Къыхэгъэщыгъэн фае рас­сказыр зэрыт файлым зытхыгъэм ыцIэрэ ылъэкъуацIэрэ ит зэрэмыхъущтыр.

Гъонэжьыкъо Сэтэнай.