Бэдзэогъум и 20-м къыщегъэжьагъэу Мыекъуапэ дэт кIэлэцIыкIу Iыгъы­пIэхэм яIофшIэн рагъэжьэжьыгъ.

Ахэм шIокI имыIэу санитарнэ-эпидемиологическэ шапхъэ­хэр ащагъэцэкIэщтых. Коронавирусыр сабыйхэм къямыутэ­кIыным мыщ фэдэ шIыкIэр фэIорышIэщт.

Сабыйхэр зыщаIыгъыщтхэ купхэр къызэIуахынхэм ыпэкIэ кIэлэцIыкIу IыгъыпIэхэр игъэ­кIо­тыгъэу аукъэбзыгъэх, Iоф щызышIэхэрэм медицинэ уплъэ­кIунхэр, коронавирусыр зэ-ра­пымылъымкIэ тестирование акIу­гъэх.

КIэлэцIыкIухэм уз зэрапымылъыр къэзыушыхьатырэ тхылъ аIыгъэу учреждением къэкIонхэ фае. IыгъыпIэм къы­чIахьэрэ пэпчъ итемпературэ ауплъэкIущт. Сабыим пэтхъу-Iутхъу иIэ фэдэу къащыхъумэ, ны-тыхэм унэм ащэжьынышъ, врачым къеджэнхэу араIощт. КIэлэцIыкIу IыгъыпIэм иIофы­шIэхэми сымаджэхэу Iоф арагъэшIэщтэп.

— Мыекъуапэ дэт организациехэм ыкIи предприятиехэм яIофшIэн рагъэжьэжьы. Къэлэ оперативнэ штабым унашъоу ышIыгъэм диштэу бэдзэогъум и 20-м къыщегъэжьагъэу кIэлэцIыкIу IыгъыпIэхэри къызэ­Iуа­хыжьых. Ахэм яIофшIэн зэрэзэхащэрэм Роспотребнад­зорыр лъыплъэщт, — къыIуагъ Мыекъуапэ имэрэу Андрей Гетмановым.

КIэлэцIыкIу IыгъыпIэм чIэс купхэр зэхэмыхьэхэу, зэпэ­чы­жьэхэу мафэхэр агъэкIощтых. Джащ фэдэу къыхэзгъэщы сшIоигъу Iофтхьабзэхэр, мэфэкI зэхахьэхэр ащ зэрэщызэха­мыщэщтхэр.