Къыблэ шъолъырымкIэ апэрэх
Урысыем ипенсионерхэм компьютерым хэшIыкIэу фыряIэмкIэ джырэблагъэ зэнэкъокъугъэх.
Я Х-рэ Урысые чемпионатэу зэхащэгъагъэм ифинал пэIудзыгъэ шIыкIэм тетэу кIуагъэ. Субъект 69-мэ ыкIи IэкIыб къэрал 15-мэ ялIыкIохэр ащ хэлэжьагъэх. Муниципальнэ образование 1162-мэ япенсионер 7400-рэ финалым ихьаным фэбэнагъ, нэсыгъэр нэбгырэ 254-р ары.
Компьютерыр зэзгъэшIэгъакIэхэмрэ хэшIыкI фызиIэу теубытагъэ зыхэлъхэмрэ куп зэфэшъхьафэу зэнэкъокъугъэх. Адыгеим щыщэу финалым нэсыгъэх Мыекъуапэ ипенсионерэу Сергей Белокрысрэ Мыекъопэ районымкIэ Наталья Кравченкэмрэ. Мыхэр теубытагъэ зыхэлъхэм ащыщыгъэх. ЕзгъэжьэгъэкIэ пенсионерэу финалым нэсыгъэх Тэхъутэмыкъое районым щыщ Шъэо Казбекрэ Мыекъуапэ ипенсионерхэм ащыщэу Мелихан Житнюкрэ.
Пенсионерхэм ПенсиехэмкIэ фондым электроннэ шIыкIэм тетэу къытырэ фэIо-фашIэхэм, узэрэлъыхъощт системэм Iоф зэрадэпшIэщтыр, интернет щынэгъончъэным хэшIыкIэу афыряIэр, Хэгъэгу зэошхор заухыгъэр илъэс 75-рэ зэрэхъурэм фэгъэхьыгъэ презентациеу унэм щагъэхьазырыгъэхэр къагъэлъэгъуагъэх.
Адыгеим икомандэ Урысыем я 24-рэ чIыпIэр щиубытыгъ, ау Къыблэ Федеральнэ шъолъырымкIэ апэрэ хъугъэ. ПенсиехэмкIэ фондым иэлектроннэ амалхэм ягъэфедэнкIэ Сергей Белокрыс я 10-рэ хъугъэ, Наталья Кравченкэмрэ Шъэо Казбекрэ унэм къыщашIын фэегъэ IофшIэнымкIэ я 5-рэ ыкIи я 6-рэ чIыпIэхэр аубытыгъэх, информацием икъэухъумэнкIэ я 4-рэ хъугъэ Мелихан Житнюк.
Адыгеим ипенсионерхэр пэIудзыгъэ шIыкIэм тетэу апэрэ зэрэхэлэжьагъэхэр, ау зэ нэмыIэми хэукъоныгъэ ашIыгъэп, тазыр къызтырагъэфагъэп, ифэшъуашэм тетэу зыкъагъэлъэгъуагъ.