Тэхъутэмыкъое районым ит поселкэу Яблоновскэм щыIэгъэ ощхышхом къыздихьыгъэ гумэкIыгъохэм ядэгъэзыжьын епхыгъэ IофшIэнхэр ыкIэм фэкIуагъэх. Тыгъуасэ пчэдыжьым сыхьатыр 10-м ехъулIэу къатыгъэ къэбарымкIэ псы кубометрэ 10373-рэ щагу ыкIи псэупIэ 205-мэ (процент 82,5-рэ мэхъу) къадащыгъ.

Шъугу къэдгъэкIыжьын, бэмышIэу поселкэу Яблоновскэм ощхышхо къызэрэщещхыгъэм къыхэкIэу нэбгырэ 616-рэ фэдиз зыщыпсэурэ, ахэм ащыщэу 153-р кIэлэцIыкIух, унэе щагу 246-мэ псыр акIэхьагъ.

АР-м и ЛIышъхьэ иунашъокIэ ом къыздихьыгъэ тхьамыкIагъом идэгъэзыжьынкIэ кIочIэ ыкIи техникэ тедзэхэр ыгъэкIуагъэх. КъумпIыл Мурат ведомствэхэм зэкIэми пшъэрылъ афи­шIыгъ кIуачIэу яIэр зэкIэ рахьылIэнышъ, гумэкIыгъор псынкIэу дагъэзыжьынэу.