Адыгеим искусствэхэмкIэ икIэлэцIыкIу еджэпIи 4-мэ Iоныгъо мазэм ехъулIэу гъэцэкIэжьынхэр ащаухыщтых. Урысые Федерацием икъэралыгъо программэу «Гъэсэ­ныгъэм хэхъоныгъэ егъэшIыгъэныр» зыфиIорэм къыдыхэлъытагъэх искусствэхэмкIэ кIэлэцIыкIу еджапIэхэу Мыекъуапэ, Красногвардейскэм, Каменномостскэм адэтхэм ыкIи Мыекъопэ художественнэ еджапIэм ягъэкIэжьын.

Зигугъу къэтшIыгъэ еджэпIи 4-мэ ягъэцэкIэжьын пэIухьащт сомэ миллиони 167,8-рэ федеральнэ бюджетым къыхагъэкIыгъ.

Мыекъуапэ дэт искусствэхэмкIэ кIэлэцIыкIу еджапIэу N 1-м игъэкIотыгъэ гъэцэкIэжьынэу рашIылIэщтым сомэ миллион 90-рэ текIодэщт. 2021-рэ илъэ­сым ащ иактовэ зал икIэрыкIэу зэтырагъэпсыхьажьыщт.

Селоу Красногвардейскэм дэт искусствэхэмкIэ кIэлэцIыкIу еджапIэр агъэцэкIэжьыным фэшI сомэ миллион 20 фэдиз фатIупщыгъ, Каменномостскэм — сомэ миллион 36-рэ, Мыекъопэ худо­жественнэ еджапIэм — сомэ миллион 25-рэ.

Объекти 4-мэ гъэцэкIэжьын IофшIэнхэр ащырагъэжьагъэх. 2020 — 2021-рэ илъэс еджэгъум ехъулIэу IофшIэнхэр аухынхэу рахъухьэ.

2020-рэ илъэсым щылэ мазэм и 15-м Урысые Федерацием и Президент Феде­ральнэ ЗэIукIэм фигъэхьыгъэ Джэпса­лъэм искусствэхэмкIэ кIэлэцIыкIу еджа­пIэхэм ягъэцэкIэжьын къыдыхэлъытагъ.

Мыхэм япхыгъэ IофшIэнхэр зэрэлъы­кIуатэхэрэм Адыгеим и ЛIышъхьэу КъумпIыл Мурат лъыплъэщт.

Iэшъынэ Сусан.