ЧIыфэр къыпщыныгъ
Адыгэ Республикэм и Джэджэ район щыпсэурэ хъулъфыгъэр къэралыгъом икIыным пае коммунальнэ фэIо-фашIэхэм ятынкIэ чIыфэу телъыр къыпщыныгъ.
Электроэнергиеу ыгъэфедагъэмкIэ сомэ мин 50 хъурэ чIыфэ хъулъфыгъэм телъыгъ, ащ къыхэкIыкIэ хьыкум приставхэм я Федеральнэ къулыкъу АдыгеимкIэ и ГъэIорышIапIэ Джэджэ районымкIэ иотдел Iоф къызэIуихыгъ.
Хьыкум пристав-гъэцэкIакIор чIыфэ зытелъым дэгущыIагъ, изекIуакIэ зэрэмытэрэзыр, ащ тазырышхо къыкIэлъыкIон зэрилъэкIыщтыр гуригъэIуагъ. Ау къулыкъушIэм къыриIуагъэр ащ зэхишIыкIыгъэп, чIыфэр игъом къыпщыныгъэп.
Хьыкум актыр игъом зэримыгъэцэкIагъэм къыхэкIэу хъулъфыгъэм къэралыгъом игъунапкъэхэр зэпичынхэ фимытэу унашъо ашIыгъ. IофшIэным епхыгъэу ар Урысыем икIын фаеу хъугъэ, ащ къыхэкIыкIэ чIыфэу телъыр зэкIэ къыпщыныжьыгъ.
Хьыкум приставхэм я Федеральнэ къулыкъу АдыгеимкIэ и ГъэIорышIапIэ шъугу къегъэкIыжьы, чIыфэ шъутелъымэ зэжъугъэшIэнэу шъуфаемэ интернет-сайтэу «www.r01.fssp.gov.ru» зыфиIорэм шъуихьанышъ, ащ къэбар ижъугъотэн шъулъэкIыщт. Джащ фэдэу электроннэ тын системэхэм амалэу къатыхэрэр къызфэжъугъэфедэзэ, сайтымкIэ чIыфэу шъутелъыр шъупщынын, ар зыфэдизыр зэрытхэгъэ квитанцие хьазыр къыдэжъугъэкIын амал шъуиI.