Адыгэ Республикэм и ЛIышъхьэу КъумпIыл Мурат ощхышхо зыдэщыIэгъэ Тэхъутэмыкъое районым ипоселкэу Яблоновскэм изытет фэгъэхьыгъэ оперативнэ зэхэсыгъо тыгъуасэ зэхищагъ. Мыщ къыхэкIыкIэ нэбгырэ 370-рэ фэдиз зыщыпсэурэ унэе щагуи 100-мэ псыр акIэхьагъ. Зэрар зэрихыгъэхэр джыри къалъытэх.

АР-м ивице-премьерэу Сапый Вячеслав къызэриIуагъэмкIэ, Чибийскэ каналым псыр зэрэдагъэлъэдагъэм ишIуа­гъэ къэкIуагъ, Iофхэм язытет нахь зыпкъ иуцуагъ. Джырэ уахътэм ехъулIэу щагухэм ыкIи подвалхэм ачIэуцогъэ псыр ошIэ-дэмышIэ IофхэмкIэ Министерствэм икъэгъэнэжьакIохэм къычIащы, ащ пае техники 7 агъэфедэ.

Тэхъутэмыкъое район администрацием ипащэу Шъхьэлэхъо Азмэт къызэрэхигъэщыгъэмкIэ, аIэкIэлъ техникэр чIыпIэ-чIыпIэу атырагощагъ. Районымрэ поселкэмрэ яадминистрациехэм яIофышIэхэмрэ МЧС-м икъулыкъушIэхэмрэ мы чIыпIэм щыIэх.

Ощхым къыздихьыгъэ гумэкIыгъохэр дэгъэзыжьыгъэнхэм фэшI къулыкъу пстэуми яIо зэхэлъэу Iоф зэдашIэн зэрэфаер Адыгеим и ЛIышъхьэ хигъэу­нэфыкIыгъ, ащкIэ вице-премьерэу Сапый Вячеслав пшъэрылъ гъэнэфагъэхэр фишIыгъэх.

— Муниципалитетым ыкIи экстреннэ къулыкъухэм зэпыугъо фэмыхъоу зэпхыныгъэ адышъуиIэн фае. Респуб­ликэм икъалэхэм ыкIи ирайонхэм аIэкIэлъ хэушъхьафыкIыгъэ техникэр Яблоновскэм жъугъакIо, ощхым къыз­дихьыгъэ гумэкIыгъохэр дэгъэзыжьыгъэнхэм пае кIуачIэу ыкIи амалэу щы­Iэр зэкIэ жъугъэфедэ. Зэрарыр нахь макIэ зэрэхъущтым пстэуми тыпылъын фае, — къыхигъэщыгъ КъумпIыл Мурат.

АР-м и ЛIышъхьэ ипресс-къулыкъу.