Адыгеим щылэжьэрэ мэкъумэщ хъызмэтшIэпIэ пэрытхэм ащыщ ООО-у «Краснодарагроальянс» зыфиIорэр. Джэджэ районыр ары чIыгухэр зыщиIыгъхэр.

Ащ иагроном шъхьаIэу Роман Завалиныр ары гущыIэгъу тызыфэхъугъэр. КъызэрэтиIуагъэмкIэ, бжыхьэсэ хьэ гектари 110-у апхъыгъагъэр Iуахыжьыгъах. ГурытымкIэ лъытагъэу, зым центнер 87,4-м нэсэу къырахыгъ. Коцым гектар 2860-рэ рагъэубытыгъагъ, ащ ызыныкъо нахьыбэр аIожьыгъах. ГурытымкIэ лъытагъэу, центнер 67-рэ къырахыжьы.

Краснодар мэкъумэщ хъызмэтымкIэ инаучнэ ушэтыпIэ институт иселекцие щыщ лэжьыгъэ чылэпхъакIэу апхъы яхабзэр. Агроном шъхьаIэм къызэриIуа­гъэмкIэ, климатым ыкIи чIыгум дэгъоу къякIунхэу институтым ишIэныгъэлэжьхэм къагъэнэфагъэхэу хьэ чылэпхъакIэу «Рубеж», коц чылэпхъакIэхэу «Таня», «Гром» ыкIи «Безостая» зыфиIохэрэр агъэфедагъэх. Джащ фэдэу ищыкIэгъэ пстэур игъом ыкIи икъоу арашIылIагъ. ТIогъогогъурэ чIыгъэшIухэр аратыгъэх, узым ыкIи нэмыкIэу иягъэ язгъэкIыщтхэм ащызыухъумэщтхэр аIэкIагъэхьагъэх.

Арэу щытми, коц хьасэхэм зэкIэми зэфэдэу къатырэп. Центнер 80-м нэсэу къызэрахыхэрэр ахэтых, 50 нахьыбэ къэзымытыри къахэкIы. ГухэкIми, чIыгулэжьым игъэ зэрэхъущтыр ом бэкIэ елъытыгъ. ГъэрекIо бжыхьэ къыщегъэ­жьагъэу ащ зэхъокIыныгъабэу фэхъу­гъэхэм мыгъэ бэмэ зэрар къафихьыгъ. Лэжьыгъэ чылапхъэр жьэу чIыгум рагъэкIугъэми, ом изытет зыфэмыIоры­шIэкIэ, хьаулые мэхъу. Ары мы хъыз­мэтшIапIэми къыщышIыгъэр.

— БлэкIыгъэ илъэсым иIоныгъо мазэ ыкIэм хэтлъхьагъэхэм мыгъэ мэлылъфэ­гъум щыIэгъэ щтыргъукIхэм иягъэ аригъэкIыгъ, — къыIуагъ Роман Завалиным. — Нэужым, чъэпыогъум и 10-м адэжь, етпхъыгъэхэр IэкIэкIыгъэхэу, ахэр ары непэ лэжьыгъэ бэгъуагъэ къэзытырэр. Коцыр Iутхыжьынэу зетэгъажьэм нахьи, ыкIэу тызыфэкIуагъэм нахьыбэу къитэхы.