Фонтанхэм ыкIи транспортым яIофшIэн рагъэжьэжьыгъ
Ящэнэрэ чэзыум хэхьэрэ гъунэпкъэ гъэнэфагъэхэр Адыгеим зэрэщытырахыжьыгъэхэм къакIэлъыкIоу фонтанхэр мэкIэ-макIэу къызэIуахыжьых.
Мы мафэм ехъулIэу Мыекъуапэ иплощадэу Дружбэм ит шъо зэфэшъхьафхэр къэзытырэ ыкIи орэд къэзыIорэ фонтаным Iоф ешIэ. Мы мазэм ыкIэхэм нэс къэлэ гупчэм ит ыкIи паркым дэт фонтанхэми яIофшIэн рагъэжьэжьыщт. Ащ епхыгъэ къэбарыр АР-м и ЛIышъхьэу КъумпIыл Мурат инстаграмым къыщыхиутыгъ.
Джащ фэдэу коронавирус узыр къырамыхьанымкIэ ыкIи зэпамыхынымкIэ къалэм щызэхащэгъэ оперативнэ штабым иунашъокIэ 2020-рэ илъэсым бэдзэогъум и 13-м къыщегъэжьагъэу цIыфхэр къезыщэкIыхэрэ организациехэу Мыекъуапэ дэтхэм яIофшIэн аублэжьыгъ.
Общественнэ транспортыр ыпэкIэ зэрэзекIощтыгъэм фэдэщт.
Коронавирусым цIыфхэр щыухъумэгъэнхэм, ящынэгъончъагъэ къэухъумэгъэным фэшI Роспотребнадзорым къафигъэнэфэгъэ шапхъэм тетэу транспортым Iоф ышIэщт. Оперативнэ штабым иунашъо къыдалъытэзэ, цIыфхэр къезыщэкIыхэрэм мафэ къэс дезинфекцие ашIынэу щыт, транспортым ыкIоцI ыкIи тIысыпIэхэр санитарнэ шапхъэхэм атетэу къабзэу аIыгъынхэ фае.
ШъунаIэ тешъотэгъадзэ, цIыфхэм ясанитарнэ-эпидемиологическэ зытет щынэгъончъэу щытыным фэшI медицинэ маскэхэр аIумылъхэу ыкIи Iалъэхэр апымылъхэу общественнэ транспортым рагъэтIысхьащтхэп.