Къыхэлэжьэнхэу къяджэх
Бэдзэогъум и 15-м къыщегъэжьагъэу шышъхьэIум и 30-м нэс Къуекъо Налбый ыцIэкIэ зэнэкъокъу зэхащэщт, адыгабзэкIэ тхыгъэ рассказ анахь дэгъур къыхахыщт.
Iофтхьабзэм кIэщакIо фэхъугъэх Circassian Repatriation Organization (Канада-Онтарио) ыкIи АР-м гуманитар ушэтынхэмкIэ иинститутэу КIэрэщэ Тембот ыцIэ зыхьырэр.
Адыгэ Республикэм ит гурыт еджапIэхэм я 9-рэ классым къыщегъэжьагъэу я 11-м нэс ащеджэрэ кIэлэеджакIохэр, гурыт ыкIи апшъэрэ гъэсэныгъэ зыщарагъэгъотырэ учреждениехэм ачIэс студентхэу илъэс 25-м шIомыкIыгъэхэр зэнэкъокъум хэлэжьэнхэ алъэкIыщт. Авторым зыфэе темэр къыхихын фит. ЫпэкIэ къыхаутыгъэгъэ тхыгъэхэри зэнэкъокъум къырахьылIэхэ хъущт.
Чъэпыогъум и 10-м кIэуххэр къэнэфэщтых. Зэнэкъокъум хэлэжьэгъэ нэбгырэ пэпчъ сертификат къыратыщт. Анахь дэгъоу агъэнафэхэрэм ахъщэ шIухьафтын афагъэшъошэщт. Зитхыгъэ къыхагъэщыгъэ ныбжьыкIэхэр езыгъэджэрэ кIэлэегъаджэхэми щытхъу тхылъхэр афагъэхьазырыгъэх. Зэнэкъокъум изэфэхьысыжьхэр, анахь дэгъоу къыхагъэщыгъэ рассказхэр Circassian Repatriation Organization ыкIи АР-м гуманитар ушэтынхэмкIэ иинститут яофициальнэ нэкIубгъохэм къарагъэхьащтых, ахэм ацIэхэр къэбарлъыгъэIэс амалхэм къаIощтых, къатхыщтых.
— Зэнэкъокъум пшъэрылъ шъхьаIэу иIэр къыткIэхъухьэрэ ныбжьыкIэхэм яныдэлъфыбзэ уасэу фашIырэм зыкъегъэIэтыгъэныр, сэнаущыгъэ зыхэлъхэр къыхэгъэщыгъэнхэр, ахэм IэпыIэгъу афэхъугъэныр ары. НыбжьыкIэхэм яныдэлъфыбзэ нахь куоу зэрагъэшIэным джащ фэдэу ар фэIорышIэщт, — къаIуагъ зэхэщакIохэм.
Гъонэжьыкъо Сэтэнай.