Iэзэгъу уцхэр ыпкIэ хэмылъэу
Лъэпкъ проектэу «Псауныгъ» зыфиIорэм къыдыхэлъытагъэу Iэзэгъу уцхэр зэригъэгъотынэу федеральнэ бюджетым къыхэхыгъэ сомэ миллион 49-рэ Адыгеим къыфатIупщыгъ.
Шъолъыр проектэу «Гу- лъынтфэ узхэм апэшIуекIогъэныр» зыфиIорэм къыдыхэлъытагъэу инфаркт, инсульт, гум епхыгъэ операциехэр зыфашIыгъэхэм ящыкIэгъэщт уцхэр аIэкIагъэхьаным ахъщэр пэIуагъэхьащт.
ЫпэкIэ ыпкIэ хэмылъэу уцхэр зэратыщтыгъэхэр инфаркт зиIэгъэ сымаджэхэр арых. Шъхьэм лъыр тэрэзэу рымыкIорэмэ, инфаркт иIагъэмэ, шунтирование фашIыгъэмэ, нэмыкI фэIо-фашIэхэр фагъэцэкIагъэмэ сымаджэм джы препаратхэр ратыщтых. Къыхэгъэщыгъэн фае, мыхэм федеральнэ фэгъэкIотэнхэр ямыIэхэми хъущт.
АР-м псауныгъэр къэухъумэгъэнымкIэ и Министерствэ иунашъокIэ уцэу агъэфедэщтхэр къыхахыгъэх, сымаджэхэм яIэзэнхэм фэIорышIэщт препарат 23-рэ ащ хэхьэ.
Урысыер пштэмэ, гу-лъынтфэ узхэм апкъ къикIыкIэ зидунай зыхъожьыхэрэм япчъагъэ апэрэ чIыпIэм щыт. Сымаджэр мыщ фэдэ узхэм амыгъэгумэкIыным фэшI ренэу Iэзэгъу уцхэм яшъон фае. Коронавирусым къэралыгъом зызыщиушъомбгъугъэ уахътэм илъэс 65-м къехъугъэ цIыфхэу мыщ фэдэ уз зиIэхэр медицинэм иучреждениехэм бэрэ ачIэмыхьанхэм фэшI Iэзэгъу уцхэр унэм афащэщтыгъэх.
Гъонэжьыкъо Сэтэнай.