2020-рэ илъэсым ПАО-у «Россети» зыфиIорэм кIэлэеджакIохэм азыфагу зэхищэгъэ Урысые олимпиадэм Мыекъопэ гурыт еджапIэу N 3-м ия 10-рэ класс ис Ольга Глатко я III-рэ шъуашэ зиIэ диплом къыщыфагъэшъошагъ.

Урысыем ишъолъыр зэфэшъхьафхэм яныбжьыкIэ пэрыт 59-мэ ар ащыщ хъу­гъэ. «Россети Кубань» зыфиIорэм и Адыгэ къутамэ бэмышIэу пшъэшъэжъы­ем щыфэгушIуагъэх. Урысые кIэлэцIыкIу зыгъэпсэфыпIэ гупчэхэм ащыщ «Россети» зыфиIорэм икомпаниехэм якупхэм щызэхащэщт энергетическэ проектнэ сменэм Ольгэ хэлэжьэн амал иIэ хъугъэ. Дунэе ыкIи урысые энергетикэм апае технологиякIэхэр ныбжьыкIэхэм къаугупшысынхэ алъэкIыщт.

Олимпиадэу зигугъу къэтшIырэр илъэс къэс едзыгъуитIоу зэтеутыгъэу зэхащэ: физикэмкIэ, хьисапымкIэ, информатикэмкIэ ыкIи зэфэхьысыжьыныр — электроэнергетикэм ылъэныкъокIэ задачэхэр къэшIыгъэнхэмкIэ шIэныгъэу аIэкIэлъыр зэрагъэфедэрэр.

Коронавирусым зиушъомбгъуным ищынагъо зэрэщыIэм къыхэкIыкIэ мы илъэсым олимпиадэр Iудзыгъэ шIыкIэм тетэу рагъэкIокIыгъ. Iофтхьабзэм псэупIи 177-мэ яеджэкIо мини 4 хэлэжьагъ (ар блэкIыгъэ илъэсым фэди 2,5-кIэ нахьыб).

Олимпиадэм икIэух едзыгъо хэхьанхэ зылъэкIыгъэр нэбгыри 198-рэ. НыбжьыкIэхэм яIофшIэнхэм жюрим осэшIу къафишIыгъ – кIэлэеджакIохэм япроцент 60-м гъэцэкIэнхэр дэгъоу къашIыгъэх.

Ольга Глатко олимпиадэм хэлэжьэным зыфигъэхьазырынымкIэ IэпыIэгъу къыфэ­хъугъэхэ «Россети Кубань» зыфиIорэм и Адыгэ къутамэ ипащэу Рустам Магдеевымрэ хьисапымкIэ икIэлэегъаджэу Валерий Резиньковымрэ рэзэныгъэ зыхэлъ тхыгъэкIэ къыхагъэщыгъэх.

Iэшъынэ Сусан.