Республикэ общественнэ движениеу «Адыгэ Хасэм» игъэцэкIэкIо куп изэхэсыгъо лъэпкъ Iофыгъохэр зэрагъэцэкIэщтхэр къыщаIуагъэх.

Адыгэ Хасэм итхьаматэу ЛIымыщэкъо Рэмэзан адыгабзэм изэгъэшIэн, игъэфедэн, хэгъэгум щыкIощт Iофтхьэбзэ­шхоу цIыфхэм якIэтхыкIыжьын фэгъэхьыгъэм Хасэр зэрахэлэжьэщтым иеплъыкIэхэр къыриIолIагъэх. Хабзэм икъулыкъушIэ­хэмрэ Адыгэ Хасэмрэ зэгъусэхэу зэшIуахыщт Iофыгъохэр нахь къыхигъэщыгъэх.

ГъэцэкIэкIо купым хэтхэу ЦIыкIушъо Аслъан, Болэкъо Аслъан, ГъукIэлI Сусанэ, Къуижъ Къэплъан, Бэгъушъэ Алый, Тхьапшъэкъо Альберт, нэмыкIхэм цIыф­хэм якIэтхыкIыжьын мэхьэнэ ин зиIэ хэ­гъэгу Iофыгъоу зэрэщытыр, ащ ежьхэр зэрэ­хэлэжьэщтхэр къаIуагъ.

Анахьэу тызыгъэгумэкIырэр тилъэпкъэгъухэр зэратхыщтхэ шIыкIэр ары. Адыгэ зэлъэпкъэгъухэр бэ мэхъух. Адыгэх, къэбэртаех, щэрджэсых, шапсыгъэх… Ахэр сыдэущтэу атхыщтха? Адыгэ (черкес) е черкес (адыг), фэшъхьаф шIыкIэхэри щыIэх.

Зэфэхьысыжьхэр джыри ашIыгъэхэп, Iофым игъэкIотыгъэу тегущыIэщтых. Лъэпкъ гупшысэ зиIэхэр, шIэныгъэлэжьхэр, нэмыкIхэри Адыгэ Хасэм къыра­гъэблэгъэщтых, унэшъо хэхыгъэхэр ашIыщтых.

Республикэм иархеологие зегъэу­шъомбгъугъэным зэлъашIэрэ археологэу Тэу Аслъан къытегущыIагъ. Адыгэ Хасэм зэхищэщт спорт зэнэкъокъухэм Хъот Юныс ащигъэгъозагъэх.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхахьэм хэлэжьагъ, зэхэщэн Iофыгъохэм къатегущыIагъ.

ЕмтIылъ Нурбый.