Зэпахырэ узэу дунаир зэлъызыкIугъэм ыпкъ къикIыкIэ Адыгеир зытехьэгъэгъэ режим гъэнэфагъэр зыщытырахыжьырэ ящэнэрэ чэзыум бэдзэогъум и 10-м хэхьагъ.

Ащ къыдыхэлъытагъэу щэпIэ-гъэпсэфыпIэ гупчэшхоу «МЕГА Адыгея-Кубань» зыфиIорэр бэдзэогъум и 11-м къызэIуахыжьыгъ, и 13-м ащ хэхьэрэ комплексэу «ИКЕА»-м иIофшIэн ригъэжьэжьыгъ.

Гупчэхэм санитарнэ шапхъэу афагъэнэфа­гъэхэр ащагъэцэкIэнхэр шIокI зимыIэ Iофэу щыт. «МЕГА Адыгея-Кубань» зыфиIорэм интернет социальнэ нэкIубгъохэм къызэращитхыгъэмкIэ, хэбзэ органхэм къызэраIуагъэм тетэу, цIыфэу къычIахьэхэрэми, щылажьэхэрэми шапхъэхэр агъэцэкIэнхэмкIэ ищыкIэгъэ пстэури агъэпсыгъ. КъызэраIуагъэмкIэ, кIэлэцIыкIу джэгупIэхэм, ным ыкIи кIэлэцIыкIум апае комнатэхэм джыри Iоф ашIэрэп, «ИКЕА»-м хэт шхапIэхэмрэ джэгупIэхэмрэ къызэIуахыжьыгъэхэп. Мыщ дэжьым АР-м и ЛIышъхьэ ипресс-къулыкъу къызэрэщыхагъэщыгъэмкIэ, джэгупIэхэм Iоф ашIэн е гъэпсэфыгъо уахътэр зэхащэн фимытхэу щытэп, ау гъунэпкъэ гъэнэфагъэхэр яIэх. Зы уахътэм цIыфэу зэдычIагъэхьащтхэм процент 50-м нахьыбэ зэлъаубыты хъущтэп.