АР-м и Къэралыгъо Совет — Хасэм идепутатхэм ягукъэкIкIэ Хэгъэгу зэошхор заухыгъэр илъэс 55-рэ зыщыхъугъэм фондэу «ТекIоныгъ» зыфиIорэр зэхащагъ. Нэужым, 2007-рэ илъэсым АР-м иветеранхэм я Совет ащ кIэщакIо фэхъугъ.

УставымкIэ пшъэрылъ шъхьа­Iэу иIэр заом иветеранхэм, ащ хэкIодагъэхэм яунагъохэм, фэгъэкIотэнхэр зиIэ пстэухэми IэпыIэгъу аIэкIигъэхьаныр ары. Хэгъэгу зэошхом исаугъэтхэм, къэхалъэхэм гъэцэкIэжьынхэр арашIылIэнхэр ипшъэрылъхэм ахэхьэ.

Мыгъэ Фондым анахьэу ынаIэ зытыригъэтыгъэр Хэгъэгу зэ­ошхор заухыгъэр илъэс 75-рэ зэрэхъугъэм ихэгъэунэфыкIын ары. Мыр республикэм зэрифэшъуашэу щызэхэщэгъэным АР-м и ЛIышъхьэу КъумпIыл Мурат ынаIэ тыригъэтыгъ.

АР-м и ЛIышъхьэ и Администрацие, муниципальнэ образованиехэм япащэхэм Фондым шIушIэ мылъку къихьаным фэшI IофшIэнышхо зэшIуахыгъ. Организацие, предприятие зэфэшъхьафхэм письмэ 500-м ехъу Фондым афигъэхьыгъ. Ащ ишIуа­гъэкIэ сомэ миллиони 8,7-рэ аугъоигъ.

Фондым ипащэхэм ацIэкIэ АР-м иминистерствэхэм ыкIи ведомствэхэм, Къэралыгъо Совет — Хасэм идепутатхэм, предпринимательхэм, предприятиехэм, мэкъумэщ хъызмэтшIапIэхэм япащэхэм шIушIэ ахъщэ Фондым къыфэзытIупщыгъэ пстэуми рэзэныгъэ гущыIэхэр апагъохых.

Анахьэу къыхэдгъэщы тшIоигъор бюджет организациехэм яIофышIэхэр ары. КIэлэегъа­джэхэм, кIэлэцIыкIу IыгъыпIэ­хэм, медицинэм иIофышIэхэм лэжьапкIэу яIэр мыбэми, шIушIэ Iофтхьабзэхэм къахэлажьэх.

Фондым ыгъэхьазырыгъэ фильмхэр республикэм ит еджа­пIэхэм, гъэсэныгъэм иучреждениехэм афагъэхьыгъэх. Ахэм ащыщых нэмыц-фашист теха­кIохэм Адыгеир къазытырахы­жьыгъэр илъэс 75-рэ зэрэхъу­гъэр, тарихъыр зыпхырыщыгъэ къэгъэлъэгъонэу «Год памяти и Славы» зыфиIорэр, адыгабзэкIэ техыгъэу «ТекIоныгъэр къэзыхьыгъэхэр», нэмыкIхэри.

Тарихъыр зыпхырыщыгъэ картинэхэр, зэо жъалымыр зы­фэдагъэр къизыIотыкIырэ та­къикъ­хэр зэрыт фильмэ 15 Фондым иI.

«Тахтамукайский район в ВОВ» зыфиIорэ тхылъэу Р.Х. Шъаом ытхыгъэр Фондым имылъкукIэ къыдагъэкIыжьыгъ. ТекIоныгъэр къызыдахыгъэр илъэс 75-рэ зэрэхъугъэм фэшI АР-м гъэсэныгъэмрэ шIэныгъэм­рэкIэ и Министерствэрэ Фондымрэ зэгъусэхэу зэнэкъокъу зэхащагъ.

«ЕджэпIэ музей анахь дэгъу» зыфиIорэ зэнэкъокъум учреждение 17-мэ зыщаушэтыгъ. Апэрэ чIыпIэр станицэу Джаджэм дэт гурыт еджапIэу N 4-м ыхьыгъ. ЯтIонэрэр Каменномостскэ дэтым фагъэшъошагъ, ящэнэрэр Тэхъутэмыкъуае дэт гурыт еджа­пIэу N 1-м къыдихыгъ. ТекIоныгъэ къэзыхьыгъэхэм шъошэ зэфэшъхьаф зиIэ дипломхэр аратыгъэх.

Зэнэкъокъоу «Старая фотография» зыфиIорэр джырэ уахътэ макIо. Джащ фэдэу первичнэ ветеран организацие анахь дэгъур къыхэхыгъэным фэгъэхьыгъэ зэнэкъокъу апэрэу республикэм щызэхащагъ. Ащ организацие 12-мэ зыщаушэ­тыгъ.

Комиссием зэфэхьысыжьхэр зешIыхэ нэуж апэрэ чIыпIэр Хьакурынэхьэблэ къоджэ псэупIэм иветеран организацие фагъэшъошагъ. Ащ ипащэу Заур Стрикачевым сомэ мин 15 хъурэ ахъщэ шIухьафтынрэ дипломрэ ратыгъэх. ЯтIонэрэ чIыпIэр Яблоновскэ щыIэ организацием ыхьыгъ. Ащ ипащэу Наталья Петрунь ахъщэ шIухьафтынэу сомэ мини 10-рэ дипломрэ фагъэшъошагъэх. ПсэупIэу Келермесскэм иветеран организацие я 3-рэ хъугъэ ыкIи ащ ипащэу Николай Грицкевич ахъщэ шIухьафтынэу соми мини 8-рэ дипломрэ ратыгъэх. Джащ фэдэу зэнэкъокъум хэлэжьагъэ­х­эм зэкIэми дипломхэр ыкIи сомэ минитIу зырыз афагъэ­шъоша­гъэх.

Фондым 2020-рэ илъэсым сомэ мин 29-рэ зыпэIухьэгъэ IэпыIэгъу нэбгырэ 18-мэ аригъэгъотыгъ. ПсэупIэу Еленовскэм щагъэтIылъыгъэ Урысыем и ЛIыхъужъэу Н.Н. Шевелевым исаугъэт агъэкIэжьынэу ыкIи гъэцэкIэжьынхэр рашIылIэнхэу сомэ мин 65-рэ ытIупщыгъ.

Организацием иIофшIэн тапэкIи хэхъоныгъэхэр фишIыхэзэ лъигъэкIотэщт. Ветеранхэм ясоветхэу Адыгеим итхэм зэгурыIоныгъэ адыриIэу адэлэжьэнэу егъэнафэ, IэпыIэгъу зищыкIэгъэ ветеранхэм, ахэм яунагъохэм, фэгъэкIотэнхэр зиIэ цIыфхэм яшIуагъэ аригъэкIыныр пшъэрылъ шъхьаIэу елъытэ.

Адыгэ республикэ Фондэу «ТекIоныгъ» зыфиIорэм ипащэу Нэхэе Юр.