УФ-м и Президентэу Владимир Путиным тызыхэт илъэсым имэзэе мазэ Джэпсалъэу къышIыгъэм уплъэкIун-лъыплъэн Iо­фыр нахь макIэ шIыгъэным, мы лъэны­къомкIэ непэ щыIэ актхэр, шъолъыр ве­домст­вэхэм­ ­яунашъохэр, шапхъэхэр ыкIи письмэ­хэр къызэте­гъэу­цогъэнхэм, пра­во­вой базэр гъэкIэжьыгъэным игъо хъу­гъэу зэрилъытэрэр къыщиIогъагъ. Ащ фэгъэхьыгъэ хэбзэгъэуцугъэхэм джыри зэ ахэплъэжьынхэуи унашъо къышIыгъагъ.

Нэужым ащ УФ-м и Правительствэ Iофышхо дишIагъ ыкIи къэралыгъо ыкIи муниципальнэ уплъэкIунхэм афэгъэхьыгъэ федеральнэ хэбзэгъэуцугъэм ипроектэу агъэхьазырыгъэм ар лъапсэ фэхъугъ. Джы УФ-м и Федеральнэ ЗэIукIэ ФедерациемкIэ и Совет регламентымкIэ ыкIи парламент Iофым изэхэщэнкIэ и Комитет субъектхэр къыкIухьэзэ законопроектым зыщытегущыIэхэрэ зэхэсыгъохэр ащызэхещэх.

БлэкIыгъэ тхьамафэм ибэрэ­скэшхо мы Комитетым ипащэ игуадзэу Светлана Горячевар зыхэлэжьэгъэ Iофтхьабзэ АР-м и Къэралыгъо Совет — Хасэм щыкIуагъ. Парламентым идепутатхэм анэмыкIэу, къэралыгъо ыкIи муниципальнэ уплъэкIунхэм афэгъэзэгъэ уплъэкIун органхэм ялIыкIохэр ащ хэлэжьагъэх.

Владимир Нарожнэм зэхэсыгъор къызэIуихызэ, къэралы­гъом ипащэ мы Iофым кIэщакIо зэ­рэфэхъугъэр, ащ иунашъо гъэцэкIэгъэным фэшI агъэхьазырыгъэ законопроектым хэбзэ органхэр, бизнесым, общественнэ объединениехэм ялIыкIохэр зэрэзэдытегущыIэхэрэр, предложение зэфэшъхьафхэр къызэрэхалъхьэхэрэр къыхигъэ­щыгъ. Ахэм нэужым хэбзэихъу­хьэхэр ахэплъэнхэу аIэкIагъа­хьэх. Адыгеим и Парламент ащ фэдэу предложениибл ыгъэ­хьазыри УФ-м и Къэралыгъо Думэ ыгъахьыгъ.

Джащ фэдэу Къэралыгъо Советым — Хасэм ипащэ бизнесым IэпыIэгъу етыгъэным, IофшIэкIэ амал тэрэзхэр иIэнхэм АР-м и ЛIышъхьэ лъэшэу ынаIэ зэрэтетым къыкIигъэт­хъыгъ. Бизнесым администра­тивнэ пшэрылъэу тегъэуагъэм ииндекскIэ Адыгеим ящэнэрэ чIыпIэр ыубытыгъ. Ащ къикIырэр уплъэкIо-лъыплъэкIо органэу республикэм Iоф щызы­шIэхэрэм бизнесым яягъэ зэ­рэрамыгъэкIырэр ары.

— Республикэм ихэбзэ гъэцэкIэкIо органхэм, муниципальнэ образованиехэм, бизнесым илIыкIохэм, общественнэ ор­ганизациехэм зэпэблагъэу Iоф зэрэзэдашIэрэм ишIуагъэкIэ предпринимательскэ Iофым игъэ­IорышIэнкIэ системэр на­хьышIу хъугъэ. Ащ пае бизнес цIыкIум ыкIи гурытым IэпыIэгъу ягъэгъотыгъэным фэгъэзэгъэнэу зы гъэIорышIэкIо орган агъэпсыгъ, — къыIуагъ Владимир Нарожнэм.

Светлана Горячевар федеральнэ хэбзэгъэуцугъэм ипроект зэрэзэхэгъэуцуагъэм къытегущыIагъ. УплъэкIун, лъы­плъэн Iофым фэгъэзагъэхэм фитыныгъэу ыкIи пшъэрылъэу яIэхэр законым щыгъэнэфагъэхэмэ, хъызмэтшIапIэхэр нахь къэу­хъу­магъэ зэрэхъущтхэр ащ къы­хигъэщыгъ. Джащыгъум уплъэ­кIокIо-лъыплъэкIо органхэр шапхъэу, Iофтхьабзэу гъэнэфагъэхэм ашIокIыщтхэп, уплъэ­кIунэу зэхащэрэр нахь макIэ хъущт. А зэпстэумэ предпри­нимательхэм яIофшIэн къагъэ­псынкIэщт.

РегламентымкIэ ыкIи парламент Iофым изэхэщэнкIэ Комитетым ипащэ игуадзэ къызэриIуагъэмкIэ, уплъэкIун органэу пшъэрылъ 220-м ехъу зыгъэцакIэхэрэм яспискэ (реестр) гъэнэфагъэу щыIэп. Ахэм на­хьыбэрэмкIэ зым ыуплъэкIугъэр адрэм икIэрыкIэу еуплъэ­кIужьы, бизнесым зиушъом­бгъуным иягъэ рагъэкIы. Ащ фэшI предпринимательхэм ате­гъэуагъэр нахь макIэ шIыгъэнэу къэралыгъом пшъэрылъ зыфигъэуцужьыгъ.

— Законопроектым фэгъэ­загъэхэм ащ лъэшэу непэ Iоф дашIэ. Субъектхэр кIэщакIо зы­фэхъугъэу къагъэхьыхэрэм ащыщ зыпари экспертхэр хэмы­плъэхэу, темыгущыIэхэу бла­гъэкIырэп. Охътэ благъэм зако­нопроектым гъэтэрэзыжьынэу фашIыгъэхэм ятаблицэу предложении 100 фэдиз зыхэхьа­гъэм ятIонэрэ еджэгъумкIэ УФ-м и Къэралыгъо Думэ хэплъэщт, — къыIуагъ Светлана Горя­чевам.

Зэхэсыгъом къыщыгущыIагъэх Парламентым идепутатхэу, комитетхэм япащэхэу Игорь Ческидовыр, Александр Лобода, АР-м ипрокурор шъхьаIэ игуадзэу КIыкI Исмахьилэ, пред­принимательхэм яфитыныгъэхэр къэухъумэгъэнхэмкIэ Уполномоченнэу Зэфэс Владислав, УФ-м и МЧС АР-кIэ и ГъэIоры­шIапIэ ипащэу Александр Зыбкиныр, нэмыкIхэр. Законопроектым къыщыдэлъытэгъэн фаехэмкIэ яеплъыкIэхэр ахэм къыраIотыкIыгъэх.

ХЪУТ Нэфсэт.