Урысые зэнэкъокъум щытекIуагъ

Мы уахътэм кIэлэцIыкIухэм техно­ло­гиякIэхэр къызфагъэфедэхэзэ гъо­гурыкIоным ишапхъэхэр зэрагъашIэх, тематическэ Iофтхьабзэхэу, джэ­гу­кIэхэу зэхащэхэрэм чанэу ахэла­жьэх.

Урысые гъэзетэу «Добрая Дорога Детства» зыфиIорэм УФ-м и Къэралыгъо автоинспекцие игъусэу творческэ зэнэкъокъоу зэхащагъэм хэлэжьагъ Пчы­хьалIыкъое гурыт еджапIэм икIэлэеджакIоу Уайкъокъо Батыр. ИцIыкIугъом къыщыублагъэу шъэожъыем гъогу тамыгъэхэм хэшIыкI дэгъу афыриI ыкIи ятэжъ автоеджапIэм зэрэщылажьэрэм ишIуагъэкIэ гъогу­рыкIоным ишапхъэхэр дэгъу дэдэу ешIэх.

Мы проектыр шIогъэшIэгъонэу Батыр зэнэкъо­къум хэлэжьагъ. Ащ тхьамафэкIэ зыфигъэхьазырыгъ. ГъогурыкIоным ишапхъэхэм хэшIыкI дэгъу зэрафыри- Iэм къыхэкIэу Батыр Урысые зэнэкъокъум иедзыгъоу «Макет» зыфиIорэмкIэ текIоныгъэр къыдихыгъ. Мы лъэныкъомкIэ Батыр иIофшIагъэ жюрим лъэшэу ыгу рихьыгъ. КIэлэеджакIом тапэкIи творческэ гупшысэхэр зыдиIыгъых. Анахь шъхьаIэу ащ ылъытэрэр гъогум щынэгъончъэу ущызекIонымкIэ гъогурыкIоным ишапхъэхэр пшIэным мэхьанэшхо зэриIэр илэгъухэм агуригъэIоныр ары.

Наркоманием пэуцужьых

Наркоманием пэуцужьыгъэным и Ду­нэе мафэ ехъулIэу Адыгеим ипо­лицие икъулыкъушIэхэм видео шIыкIэм тетэу конференцие зэхащагъ.

Ащ хэлэжьагъэх зэфэшIыгъэ шIыкIэм тетэу Iоф зышIэрэ Мыекъопэ хэушъхьафыкIыгъэ егъэджэн-пIуныгъэ училищэу Красногвардейскэ районым итым чIэсхэр.

Илъэс 12 — 14 зыныбжь кIэлэцIыкIухэм зэдэгущыIэгъу адыриIагъ полицием имайорэу Денис Соф-Оглы. Ащ Iэтахъохэм анаIэ тарыригъэдзагъ наркоманиер уз хьылъэу зэрэщытым, ащ цIыфым ышъхьэ фимытыжьэу ищыIэныгъэ зэрэзэрихъокIырэм.

«КIэлэцIыкIур наркотикым щыухъумэгъэныр хэбзэ­ухъумэкIо къулыкъухэм ямызакъоу кIэлэпIухэми, ны­тыхэми япшъэрылъ шъхьаIэу щытын фае. Зыны­бжь имыкъугъэр гъогу пхэндж зытехьэкIэ, ежь-ежьырэу ищыIэныгъэ екъутэ, ащ нэмыкIэу административнэ ыкIи уголовнэ пшъэдэкIыжьхэр ыхьынхэм ищынагъо къэуцу», — еIо полицием иIофышIэ.

Нэужым профилактическэ хэушъхьафыкIыгъэ видео­техыгъэм кIэлэцIыкIухэр рагъэплъыгъэх.

Социальнэ-психологическэ IофшIэнымкIэ директорым игуадзэу Хъут Саидэ къызэриIуагъэмкIэ, наркоманием пэуцужьыгъэным и Дунэе мафэ фэгъэхьыгъэу илъэс къэс зэхащэхэрэ акциехэм, Iофтхьабзэхэм кIэлэцIыкIухэр ахагъэлажьэх. Мыгъэ сурэтшIынымкIэ творческэ зэнэкъокъу зэхащагъ, наркоманием игумэкIыгъохэр, ныбжьыкIэхэр ащ щыухъумэгъэнхэ зэрэфаер кIэлэцIыкIухэм ясурэтшIыгъэхэмкIэ къыраIотыкIыгъэх.

КъэIогъэн фае, АР-м хэгъэгу кIоцI IофхэмкIэ и Министерствэ епхыгъэу зыныбжь имыкъугъэхэм яIоф­хэмкIэ къулыкъум министерствэм епхыгъэу Iоф зышIырэ Общественнэ советым илIыкIохэр, Адыгеим щызэлъашIэрэ артистхэр, спортсменхэр, кIэлэегъа­джэхэр игъусэхэу ренэу хэушъхьафыкIыгъэ училищым макIох, зэдэгущыIэгъу гъэшIэгъонхэр кIэлэцIыкIухэм адашIых.

Полицейскэхэм зэралъытэрэмкIэ, мы училыщым къычIэфагъэхэр гъогу занкIэ техьажьынхэмкIэ амал дэгъухэр ащаратых.

Iофтхьабзэу «Iушъхьэ-2020»

Межведомственнэ зэхэубытэгъэ опе­ративнэ-профилактическэ Iоф­тхьабзэу «Iушъхьэ-2020» зыфиIорэм иятIонэрэ едзыгъо Адыгеим щаухыгъ.

Мы IофтхьабзэмкIэ мурадэу яIагъэр наркотикыр хэбзэнчъэу къезыгъэкIокIыхэрэр, IузыгъэкIыхэрэр ыкIи ар зыгъэфедэхэрэр къэубытыгъэнхэр, ахэм пшъэдэкIыжь ягъэхьыгъэныр ары.

Iофтхьабзэм иятIонэрэ едзыгъор окIофэ мы лъэныкъомкIэ бзэджэшIэгъи 7 къыхагъэщыгъ. Лажьэ яIэу зэгуцафэхэрэ нэбгыри 5 къаубытыгъ ыкIи ахэм уголовнэ пшъэдэкIыжь арагъэхьыгъ. Ащ нэмыкIэу етIани нэбгырэ 17-мэ административнэ пшъэдэкIыжьхэр атыралъхьагъэх, ахэм ащыщэу нэбгыри 6-мэ хэбзэнчъэу наркотикыр къызэрагъэкIыгъэм фэшI.

Джащ фэдэу грамм 800 хъурэ наркотик лъэпкъхэу «кIэпыр» ыкIи «гашишыр» хэбзэнчъэу къырагъэкIокI- хэу къаIахыгъэх.

Адыгеим иполицие цIыфхэм закъыфегъазэ! Хэ­бзэн­чъэу наркотикыр къызэрэрагъэкIокIырэм щыгъуа­зэхэу щытхэмэ, Мыекъуапэ хэгъэгу кIоцI къулыкъум иномерхэу (8772) 59-64-00-кIэ, 52-57-27-кIэ е 02-кIэ (мобильнэ телефонымкIэ утеощтмэ 102-кIэ) макъэ къарагъэIунхэу.

УплъэкIунхэр зэхещэх

БэмышIэу пчыхьэм Мыекъуапэ гъогу хъугъэ-шIагъэу къыщыхъугъэм кушъхьэфачъэм тесыгъэр хэфагъ.

ПэшIорыгъэшъэу зэрагъэунэфыгъэмкIэ, илъэс 13 зыныбжь Iэтахъор кушъхьэфачъэм тесэу игъогу къыте­кIи, гъогу шъхьаIэм зытехьэм, илъэс 33-рэ зыныбжь хъулъфыгъэу мотоциклэм тесэу къачъэрэм еутэкIыгъэу ары.

Мы хъугъэ-шIагъэм ыпкъ къикIэу кушъхьэфачъэм тесыгъэ Iэтахъом шъобжхэр тещагъэхэу сымэджэщым чIэлъ. Мыекъуапэ икъэралыгъо автоинспекцие икъулыкъушIэхэм мыщкIэ административнэ зэхэфынхэр рагъэкIокIых.

Адыгеим иавтоинспекцие къызэритыгъэмкIэ, 2020-рэ илъэсым имэзитфэу пыкIыгъэм кушъхьэфачъэм тесхэр зыхэфэгъэхэ хъугъэ-шIэгъитIу Адыгеим щагъэу­нэфыгъ, нэбгыритIумэ шъобжэр атещагъэхэ хъугъэ.

Адыгеим иполицие кушъхьэфачъэр зыгъэIоры­шIэхэрэм закъыфегъазэ сакъыныгъэ гъогум къызщыхагъэфэнэу ыкIи гъогурыкIоным ишапхъэхэр амыу­къонхэу.

Къэорэ пкъыгъор агъэкIодыгъ

Росгвардием и ГъэIорышIапIэу АР-м щыIэм ОМОН-м иинженернэ-техническэ куп икъулыкъушIэхэм къуаджэу Фэдз къыщагъотыгъэ къэорэ пкъыгъор агъэкIодыгъ.

ОМОН-м икъулыкъушIэхэм зэрагъэунэфыгъэмкIэ, къуаджэу Фэдз щыщ горэм мэкъумэщ IофшIэнхэр ышIэхэзэ Хэгъэгу зэошхом щагъэфедэщтыгъэ мм 82-рэ хъурэ лагъымэр къыгъотыгъ. Специалистхэм зэрагъэунэфыгъэмкIэ, лагъымэр къэонымкIэ я 2-рэ степень иIэу щынагъоу щытыгъ.

Лагъымэр зыдэщылъыгъэ чIыпIэр къадзыхьи, ар агъэкIодыгъ.

Росгвардием икъулыкъушIэхэм цIыфхэм закъыфегъазэ, зэгуцафэхэрэ пкъыгъо горэ къагъотыгъэмэ, ащ гъунэгъоу емыкIолIэнхэу ыкIи емыIэбынхэу. Мыщ дэжьым псынкIэу хэбзэухъумэкIо къулыкъухэм макъэ арагъэIунэу къяджэх.

Къэзыгъэхьазырыгъэр КIАРЭ Фатим.