Урысые Народнэ фронтым ишъолъыр къутамэу Адыгеим щы­Iэр Мыекъуапэ изэтегъэпсыхьан епхыгъэ муниципальнэ зэзэгъы­ны­гъэ­хэм язэхэфын игъэкIотыгъэу хэплъэщт.

Мы лъэныкъомкIэ дэо тхы­лъыбэ къызэрафакIорэм ар епхыгъ. Аужырэ тхыгъэу къафагъэхьыгъэр зыфэгъэхьы­гъа­гъэр псыхъоу Шъхьэгуащэ телъ лъэмыджым изытет уигъэ­рэ­зэнэу зэрэщымытыр ары.

Народнэ фронтым къемыуа­лIэхэзэ мы упчIэм изэхэфын цIыфхэр бэрэ ыуж итыгъэх. Iофым къэлэ прокуратурэри къыхэхьагъ. Ащ ыуж ары ныIэп гъэцэкIэжьынхэр зыра­гъэжьагъэхэр.

— ЦIыфхэм зигугъу къашIыгъэ гъуанэхэм гъэцэкIэжьынхэр рашIылIагъэх. Ау ар зэрашIыжьыгъэ шIыкIэм уигъэ­рэзэнэу щытэп. Ащ нэмыкIэу лъэмыджым щынэгъо чIыпIэ­хэр джыри иIэх. IофшIэнхэр зэрифэшъуашэу ашIынхэу тэ­гугъэ, — къыIуагъ ОНФ-м ишъолъыр гъэцэкIэкIо комитет ипащэу Юрий Гороховым.

ЛъэсрыкIо лъэмыджым район цIыкIоу «Забелая» зыфиIорэмрэ къэлэ гупчэмрэ зэрепхых. Ар сыдигъуи цIыф кIуапIэу щыт. Пандемием ыпкъ къикIыкIэ аужырэ мазэхэм лъэмыджымкIэ зэпырыкIыхэ­рэм япчъагъэ фэдитIукIэ на­хьыбэ хъугъэ. Гъогум тет маршрутнэ таксихэм Iоф зэрамышIэрэм ыпкъ къикIыкIэ цIыфыбэхэм мы лъэмыджым рыкIонхэр къыхахы. Ар щы­нэгъончъэнэу щытыныр пшъэ­рылъ шъхьаIэхэм ащыщ.

— ГухэкI нахь мышIэми, илъэс къэс мыщ фэдэ тэлъэгъу. ЦIыфхэр бэрэ зытхьаусыхэрэ нэужыр ары лъэмыдж­хэм гъэцэкIэжьынхэр зыра­шIылIэхэрэр. ПшъэдэкIыжьыр зыхьыхэрэм нахьыбэрэ мыщ фэдэ чIыпIэхэр ауплъэкIун фаеба? — игупшысэхэмкIэ къыддэгуащэ Юрий Гороховыр.

Гъонэжьыкъо Сэтэнай.