Ны мылъкум къыхэхыгъэу ахъщэ тын мазэ къэс къафэкIонэу агъэпсымэ ашIоигъоу Адыгеим щыпсэурэ унэгъо 577-мэ УФ-м ПенсиехэмкIэ ифонд и Къутамэу АР-м щыIэм зыкъыфагъэзагъ.

2018-рэ илъэсым ятIонэрэ сабыир къызфэхъугъэ е ыпIунэу зыштэгъэ унагъохэр ары мыщ къыхиубытэхэрэр. Ахъщэ тыныр къатефэмэ ашIэным пае аужырэ мэзэ 12-м гъотэу яIагъэр нэбгырэ пчъагъэу исым тырагощэн фае. Зы нэбгырэм тефэрэр цIыфыр зэрэпсэун ылъэкIыщт ахъщэ анахь макIэу субъектым щагъэнэфагъэм фэдитIум нэмысырэмэ, лъэIу тхылъыр ытын фит.

Адыгеим ащ фэдэ ахъщэ тыныр унагъом къыщыратыным пае зы нэбгырэм тефэрэр сомэ 20206-м ехъунэу щытэп. Мазэ къэс къатыщтыр сомэ 9599-рэ мэхъу. Унагъом гъотэу иIэр къызалъытэкIэ лэжьапкIэхэри, пенсиехэри, социальнэ ахъщэ тынхэри, стипендиехэри, нэмыкI ахъщэ компенсациехэри къы­далъытэх. Ахэр тхылъхэмкIэ къэгъэшъыпкъэжьыгъэнхэ фаеу щыт.

ЛъэIу тхылъыр ПенсиехэмкIэ фондым ичIыпIэ органэу унагъор зыпэблагъэм, МФЦ-м е «унэе кабинетым» ащитын ылъэ­кIыщт. КIэлэцIыкIум ыныбжь илъэсищ мэхъуфэкIэ зыщыфаем ытын фит. КIэлэцIыкIум ыныбжь мэзихым шIомыкIызэ лъэIу тхылъыр ытыгъэмэ, апэрэ мафэу къызщыхъугъэм е ыпIунэу зыщиштагъэм къыщегъэжьагъэу къалъытэщт, нахь кIасэ хъугъэмэ, тхылъыр зыщитыгъэм къыщыублагъэу къатыщт.

Ны мылъкум исертификат зытетхагъэм исчет кIэлэцIыкIум ыныбжь илъэсищ мэхъуфэкIэ ахъщэр къихьащт. Ны мылъкум къыщыдэлъытэгъэ ахъщэр унагъом ыухыгъэмэ е зыщыпсэурэ чIыпIэр зэблихъугъэмэ ахъщэ тыныр къагъэуцущт. Ар къызыфакIорэр илъэс зыхъукIэ, тхылъхэр икIэрыкIэу ыгъэхьазырыжьынхэ фае.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.