АР-м и ЛIышъхьэу КъумпIыл Мурат Лъэпкъ музеир зэрагъэцэкIэ­жьы­­рэр зэригъэлъэгъугъ. Къэралыгъо программэу «Развитие куль­ту­ры» зыфиIорэм ыкIи федеральнэ инвестиционнэ программэм ар къадыхэлъытагъ, пстэумкIи сомэ миллион 250-рэ фэдиз пэIуа­гъэ­хьащт.

Проектым къыдыхэлъытагъэу рашIылIэщтхэм респуб­ликэм ипащэ къащагъэгъозагъ АР-м культурэмкIэ иминистрэу Аулъэ Юрэрэ музеим ипащэу Джыгунэ Фатимэрэ. Псэуалъэр зэрагъэцэкIэжьыщтым имыза­къоу, фондым иIыгъыпIэнэу квадратнэ метрэ мини 2 хъурэ унэу къатищэу зэтетыр къы­гуашIыхьащт.

Непэ музеим ифонд экспонат мин 300-м ехъу хэлъ. Ахэр шIыкIакIэу лъэхъаным къызди­хьыгъэхэр къыдэлъытагъэхэу аIыгъынхэ амал унакIэу ашIыщтым къытыщт. ГущыIэм пае, экспонатхэм ящыкIэгъэ температурэр ыкIи шынэгъакIэр къэзытыщт системэр щыгъэпсы­гъэщт.

Ащ нэмыкIэу, джы Iоф зы­шIэрэ залхэр, IыгъыпIэхэр агъэ­кIэжьыщтых, цIыфхэм зыща­плъыхьанэу псэолъакIэхэр щагъэпсыщтых. Музеим ищагу «Адыгэ хапIэкIэ» зэджагъэхэ этнографическэ комплексэу ижъыкIэ адыгэхэм агъэфедэщтыгъэ унэгъо IапIэхэр, лъэпкъ Iэпэщысэхэр зычIэлъыщтхэр, адыгэ шхыныгъохэр къызщатыщтхэр дагъэуцощт, ащ адыгэ кIыщ гуашIыхьащт. ПстэумкIи «Адыгэ хапIэм» квадратнэ метрэ мин фэдиз ыубытыщт. Джащ фэдэу фондым, экспозициехэм, конференц ыкIи актовэ залхэм, библиотекэм апае оборудованиехэр къащэфыщтых.

АР-м и ЛIышъхьэ музеим игъэкIэжьын зэрэкIорэм ынаIэ тыримыхынэу культурэмкIэ ми­нистрэм фигъэпытагъ.

— Лъэпкъ музеир социальнэ ыкIи культурнэ мэхьанэ зиIэ псэуалъэу щыт. Ар адыгэхэм ятарихъ-культурнэ кIэн къэгъэ­нэжьыгъэным, къыткIэхъухьэрэ лIэужхэм япIун афэIорышIэ. Ахэм ямызакъоу, музеим рес­публикэм икъэлэ шъхьаIэ къыгъэдэхэн, къыпэблэгъэ архитектурнэ ансамблэм, Зэкъошны­гъэм, ЗыкIыныгъэм ыкIи Зэ­гурыIоныгъэм яплощадь, мэщытым ыкIи Къэралыгъо филармонием адиштэн фае, — къы­Iуагъ КъумпIыл Мурат.

Псэуалъэм игъэкIэжьын да­кIоу чIыпIэу къыпэIулъыри зэтырагъэпсыхьанэу республикэм ипащэ къариIуагъ. Джащ фэдэу гъэпсэфыпIэ чIыпIэхэм яшIын муниципалитетхэм ащылъагъэ­кIотэныр шIокI зимыIэ Iофэу зэрэщытым къыкIигъэтхъыгъ.

Лъэпкъ проектэу «Культурэм» Адыгеир зэрэхэлажьэрэм ишIуагъэкIэ илъэсэу тызыхэтым культурэм иунэхэу 5 къоджэ псэупIэхэм ащагъэкIэжьы, зы унэ кIэу ашIы. Ахэм пстэумкIи сомэ миллион 82-рэ апэIухьащт. Джыри 2021 — 2023-рэ илъэс­хэм агъэкIэжьынхэу ащ фэдэ учреждение 15-мэ апае тхылъхэр УФ-м культурэмкIэ и Министерствэ фагъэхьыгъ. Ахэм сомэ миллион 240-рэ апэIухьанэу къалъытагъ.

АР-м и ЛIышъхьэ ипресс-къулыкъу