Адыгэ Республикэм щы­псэурэ къэндзалхэм культу­рэмкIэ яорганизациеу «Дуслыкым» илъэсыбэрэ пэщэныгъэ дызезыхьэгъэ А. Илья­совыр игъонэмысэу дунаим ехыжьыгъ. Медицинэ сэнэхьатым рылажьэзэ, общественнэ Iофыгъохэр ыгъэцакIэхэзэ цIыфхэм шIу афишIэным пы­лъыгъ, Мыекъуапэ инароднэ депутатхэм я Совет идепута­тэу хэдзыгъо зэфэшъхьафхэм ащыхадзыгъ. Къэндзалхэм я Дунэе зэIукIэ изэхахьэ хэлажьэ­зэ, ныдэлъфыбзэр, тари­хъыр зэгъэшIэгъэнхэмкIэ, къэн­дзал­хэм ялъэпкъ еджапIэ, музей Мыекъуапэ къыщызэ­Iу­хыгъэн­хэм иIахьышхо ахи­шIыхьагъ.

Адыгэхэмрэ къэндзалхэмрэ язэкъошныгъэ гъэпытэгъэ­ным, шэн-хабзэхэр зэрагъэшIэнхэм, Адыгэ Республикэм икъэралыгъо гъэпсыкIэ хэхъо­ныгъэ­хэр егъэшIыгъэнхэм ишъыпкъэу пылъыгъ. Адыгеим ­илъэпкъ общественнэ движениехэм язэпхыныгъэхэр щыIэныгъэм щыгъэпытэгъэнхэмкIэ, Iофыгъуабэмэ кIэща­кIо, зэхэщакIо афэхъущтыгъ.

Адыгэ Республикэм щыкIорэ мэфэкIхэм къэндзал шъуа­шэхэр ащыгъэу «Дуслыкым» хэтхэр зэрэхэлажьэхэрэм, мэ­фэкIхэм лъэпкъхэр зэрэзэфащэхэрэм рыгушхощтыгъ.

ЫныбжьыкIэ къытефэу пенсием зэкIом ыуж рэхьатэу щысыгъэп. ИсэнэхьаткIэ Iоф ышIагъ, общественнэ Iофхэм ахэлэжьагъ. Зэпахырэ узым апэу пэуцугъэ врачхэм, цIыф­хэм IэпыIэгъу афэхъугъэхэм ащыщ.

А. Ш. Ильясовым тиреспуб­ликэ итын анахь лъапIэу «Адыгеим и Щытхъузехьэр», нэмыкIхэр къыфагъэшъоша­гъэх.

Ныбджэгъу хьалэлэу, цIыфы­шIоу А. Ш. Ильясовым ыгу къытемыожьырэми, ишIушIагъэкIэ къытхэтыщт. Тхьэм джэ­нэт къыует, «Адыгэ ма­къэм» иныбджэгъу лъапIэу А. Ш. Ильясовыр. О уигукIэгъу, уиIоф­шIагъэ шIукIэ тыгу илъыщт.

Ныбджэгъу куп