Адыгеим апэрэу щатхыгъэх
2020-рэ илъэсым бэдзэогъум и 1-м къыщегъэжьагъэу ежь ышъхьэ Iоф фэзышIэжьыхэрэм хьакъулахь зэратыщт шIыкIакIэр Адыгеим щырагъэжьагъ.
Ащ амалэу къаритырэр ябизнес нэпцI хэмылъэу лъагъэкIотэн ыкIи хэбзэнчъэу предпринимательствэ IофшIэныр зэрагъэцакIэрэмкIэ тазыр атырамылъхьаныр ары.
Адыгэ Республикэм предпринимательствэм IэпыIэгъу фэхъугъэнымкIэ и Гупчэ ежь ышъхьэ Iоф фэзышIэжьырэ нэбгыри 4 щатхыгъ. А купым къыхиубытэхэрэр ыпкIэ зыхэмылъ фэIо-фашIэхэр ящыкIагъэхэу «Мой бизнес» зыфиIорэ гупчэм зыфагъазэ.
Бизнес цIыкIум ыкIи гурытым хахьэхэрэм къэралыгъо IэпыIэгъоу арагъэгъотырэр зэкIэ ежь-ежьырэу ахъщэ къэгъэхъапIэ къэзыгъотыхэрэм къызфагъэфедэнхэ алъэкIыщт. Ахэм кредитнэ-гарантийнэ IэпыIэгъу, фэгъэкIотэн зиIэ ахъщэ чIыфэ цIыкIухэр аратынхэ, лизинг ыкIи гъэсэныгъэ программэхэм ахэлэжьэнхэ амал щыI. Ащ дакIоу бизнес цIыкIум ыкIи гурытым исубъектхэм яреестрэ ежь ышъхьэ Iоф фэзышIэжьыхэрэм якъэбар хагъэхьащт.