Урысые Народнэ фронтым «Проект Жизнь» зыфиIорэ генеалогиче­скэ гупчэр игъусэу унагъохэм ятарихъхэр къызщыраIотыкIыщт проект тикъэралыгъо щызэхащэ.

Унагъом, шIулъэгъум ыкIи шъыпкъагъэм я Мафэ фэгъэ­хьыгъэу #ВремяДляСемьи зы-фи­Iорэ флешмоб тикъэралыгъо щырагъэкIокIы. ЗэхэщакIохэм къызэрэхагъэщыгъэмкIэ, цIыфхэм мэфэкIым анаIэ тырадзэным, унагъом имэхьанэ къэIэтыгъэным ар фэIорышIэщт. Ахэм къызэралъытагъэмкIэ, акцием нэбгырэ мин 60-м ехъу хэлэ­жьэщт, социальнэ хъытыум миллион 12-м ехъу зэлъиубытыщт.

— Анахь мэхьанэ ин зиIэ мэ­фэкIхэм ащыщым ипэгъокIэу Iофтхьабзэр зэхэтэщэ. Ащ хэлэжьэщтхэм янэ-ятэхэр, янэжъ-­ятэжъхэр нэIуасэ зыщызэфэ­хъугъэхэ лъэхъаным «агъэзэ­жьын», е ежьхэм яшъхьэгъусэ зыщалъэгъугъэгъэ уахътэр агу къагъэкIыжьын фае, — къыIуагъ Урысые Народнэ фронтым ишъо­лъыр къутамэу Адыгеим щыIэм иактивистэу Елена Зезюкинам.

Iофтхьабзэм хэлажьэхэрэм социальнэ нэкIубгъохэм сурэтитIу къарагъэхьан фае — нэIуасэ зыщызэфэхъугъэхэ уахътэм щытырахыгъагъэмрэ непэрэ мафэм ашIыгъэ сурэтымрэ. Ахэм ачIэгъ тарихъыр кIатхэщт ыкIи акцием итегхэу — #ВремяДляСемьи ыкIи #8июля пагъэуцожьын фае. Сыд фэдэ социальнэ нэкIубгъокIи флешмобым ухэлэжьэн плъэ­кIыщт. Ащ къарагъэхьэгъэ пстэури акцием исайтэу «времядлясемьи.рф.» зыфиIорэм итыщтых. Зэфэхьысыжьхэр бэдзэогъум и 8-м ашIыщтых.

Флешмобым нэмыкIэу, «Инстаграм» нэкIубгъом активистхэм интерактивнэ маскэ-джэгукIэ щызэхащагъ. Джащ фэдэу «ВКонтакте» зыфиIорэмкIи Iоф­тхьэбзэ гъэшIэгъонхэр рагъэ­кIокIыщтых. Пстэури зыфэгъэ­хьыгъэр унагъом имэхьанэ цIыф­хэм джыри нахь куоу къагурыIоныр, ащ уасэу фашIырэм зыкъегъэIэтыгъэныр ары.

Гъонэжьыкъо Сэтэнай.