Лъэныкъо пстэумкIи апшъэрэ гъэсэныгъэ зэзыгъэгъоты зышIоигъохэм бэдзэогъум и 6 — 7-м урысыбзэмкIэ экзамен атыщт. Ар мыгъэ нэ­­бгырабэмэ аты зэрашIоигъом къыхэкIыкIэ апэрэу мэфитIурэ ре­кIокIыщт. Санитарнэ шапхъэхэр гъэлъэшыгъэу къыдыхэлъытэгъэщтых.

АдыгеимкIэ еджапIэр къэзыухыгъэ 1587-рэ урысыбзэмкIэ зыкI ушэтыным хэлэжьэщтых. Ар чIыпIи 10-мэ ащатыщт. Ахэр зэкIэ игъом технологическэу, санитарнэу зэтырагъэпсыхьа­гъэх.

ЕджакIохэм маскэхэр, Iалъэ­хэр амыгъэфедэнхэм фэшI ушэ­тынхэр зыщыкIощтхэ аудито­риехэм жьыр зыгъэкъэбзэрэ пкъыгъохэр ачIагъэуцуагъэх. Ащ дакIоу метрэ 1,5-рэ азыфагоу агъэтIысыщтых. Джащ фэдэу экзамен тыгъор зэкIахьи, фэбэ дэдэ къызэрэхъугъэм къыхэкIыкIэ мыщ сплит-системэхэр ачIагъэуцуагъэх.

— ЦIыфым температурэ иIэу агъэунэфымэ экзаменыр рагъэ­тыщтэп. Бэдзэогъум и 25-м ыуж ушэтыныр зыщатыжьыщт мэфэ тедзэхэр ахэм афагъэнэфэщтых, — къыщаIуагъ Мыекъопэ къэлэ администрацием гъэсэныгъэмкIэ и Комитет.

Мы илъэсым аттестат къаратыныр урысыбзэмкIэ ЕГЭ-м епхыгъэп. Адрэ предметхэмкIи экзаменхэр джащ фэд. Хэд­гъэу­нэфыкIымэ тшIоигъу, мыгъэ еджапIэр къэзыуххэрэр апшъэрэ еджапIэм чIэхьанхэмкIэ ядокументхэр шышъхьэIум и 17-м нэс рагъэхьынхэ амал яI. А IофымкIэ къиныгъо хафэхэрэм апае техническэ IэпыIэгъум ипунктхэр къызэIуахыгъэх: гурыт еджапIэу N 9-м (Мыекъуапэ) ыкIи гурыт еджапIэу N 24-р (Ханскэм).

Iэшъынэ Сусан.