Адыгэ къэралыгъо университетыр къэзыухырэ студентхэм «Уходя остаемся с АГУ» зыфиIорэ Iофтхьабзэр илъэс къэс афызэхащэ.

Хабзэ зэрэхъугъэу, мы пчы­хьэзэхахьэм апшъэрэ гъэсэ­ны­гъэр зэзыгъэгъотыгъэ ныбжьыкIэхэр зэкIэ къыщызэрэугъо­их, илъэс еджэгъухэр зыфэдагъэхэр агу къагъэкIыжьы. Ау мыгъэ ар нэмыкIэу рагъэкIо­кIыгъ. Адыгэ къэралыгъо университетым ипчъэхэр къызщызэIуихыгъэхэ илъэсым къыщегъэжьагъэу онлайн шIыкIэр апэрэу мы илъэсым къызфагъэ­федагъ.

Бэдзэогъум и 2-м Адыгэ къэралыгъо университетым YouTube каналэу иIэм эфир занкIэ щашIыгъ. 2020-рэ илъэсым апшъэрэ еджапIэр къэзыухыгъэхэр тарихъым хэщагъэхэ хъугъэх. Онлайн шIыкIэр къыз­фагъэфедэзэ мыщ фэдэ Iоф­тхьабзэ зэрэзэхащагъэр джыри бэрэ агу къэкIыжьыщт.

Каналым къихьэгъэ пстэуми Iофтхьабзэр зезыщэхэрэм шIу­фэс гущыIэхэр апагъохыгъэх. Ахэм къызэраIуагъэмкIэ, студент мин фэдизмэ мыгъэ университетыр къызэраухыгъэр къэзыушыхьатырэ дипломхэр аратыжьыщтых. Ахэм лъэныкъо зэфэшъхьаф 20-м ехъурэмкIэ гъэсэныгъэ программэ 67-м къыщымыкIэу шIэныгъэ зэрагъэ­гъотыгъ.

Iофтхьабзэм къыхэлэжьагъэх апшъэрэ еджапIэм идеканхэр, кIэлэегъаджэхэр, университетым иадминистрацие илIыкIохэр, нэмыкIхэри. ЗэкIэ къэгущыIагъэхэр студентхэм къафэгушIуа­гъэх, тапэкIи гъэхъэгъэшIухэр ашIынхэу къафаIуагъ.

— ЩыIэныгъэм лъэбэкъу ин щышъушIыщт, — студентхэм закъыфигъэзагъ ректорэу Мамый Даутэ. — Университетыр къэшъуухыгъ нахь мышIэми, ипчъэхэр сыдигъуи шъощ пай зэIухыгъэщтых.

Илъэс еджэгъухэм чанэу зыкъэзыгъэлъэгъогъэ ныбжьыкIэхэр хабзэ зэрэхъугъэу университетым щагъашIох. «Почетный студент» зыфиIорэ цIэр къыратынэу факультет пэпчъ зы нэбгырэ къыхахырэр. Лъэны­къо зэфэшъхьафхэмкIэ зэрифэшъуашэу зыкъэзыгъэлъэгъуа­гъэу, еджапIэм ыцIэ дахэкIэ рязыгъэIогъэ ныбжьыкIэхэм ацIэхэр эфир занкIэмкIэ къаIуа­гъэх, щытхъу тхылъхэр аратыгъэх.

ЕджэнымкIэ, спортымкIэ, общественнэ IофшIэнымкIэ е нэмыкI лъэныкъохэмкIэ илэгъу­хэм къахэщыгъэ студентхэри джащ фэдэу агъэшIуагъэх.

Адыгэ къэралыгъо университетыр къэзыухырэ студентхэр зыхэтыгъэ купхэм яномерхэмкIэ Iофтхьабзэр лъагъэкIотагъ. Сэнаущыгъэ зыхэлъ ныбжьыкIэхэу орэд къэIоным, къэшъоным, нэмыкI лъэныкъохэм афэкъулайхэм якъэгъэлъэгъонхэмкIэ эфир занкIэр баигъэ.

Адыгэ филологиемрэ культурэмрэкIэ ифакультет илъэситфырэ щеджэгъэ Беданыкъо Алан тызэрэщигъэгъозагъэмкIэ, «Культура и творчество» зыфиIорэ лъэныкъомкIэ къыхагъэ­щыгъ.

— СищыIэныгъэ щыщ хъугъэ университетыр сыдигъуи сыгу илъыщт, ащ гукъэкIыжьэу фысиIэхэр сщыгъупшэщтхэп, — къытфеIуатэ Алан. — Мы илъэ­сым «Уходя остаемся с АГУ» зыфиIорэ Iофтхьабзэр нэмыкIэу зэхэщагъэ хъугъэ нахь мышIэми, мэфэкIыр зэрифэшъуашэу рекIокIыгъэу сэлъытэ. Пстэуми анахь шъхьаIэр псауныгъэр къэухъумэгъэныр ары. ЦIыфхэм ящынэгъончъагъэ къыдэлъытагъэу зэхэщэгъэ Iофтхьабзэр студентхэмкIи кIэлэегъаджэхэмкIи гъэшIэгъоныгъэ.

ТигущыIэгъу еджэным зэ­рэфэщагъэм дакIоу искусствэри икIас. Сэнаущыгъэу хэлъым хигъэхъоным фэшI искусствэ­хэмкIэ институтым чIэхьагъэу щеджэ. Адыгэ филологиемрэ культурэмрэкIэ ифакультет зэрифэшъуашэу къыухи, шIэныгъэ куухэр зэригъэгъотыгъэх. Къы­хэгъэщыгъэн фае студент этнографическэ проектэу «Корни» зыфиIорэм ар кIэщакIо зэрэ­фэхъугъагъэр. БлэкIыгъэ илъэсым мы Iофтхьабзэр зэрифэшъуашэу республикэм щырагъэ­кIокIыгъ.

— Университетыр къызэрэсыухырэмкIэ сэгушIо ыкIи тIэкIу сыгу къео, — игупшысэхэмкIэ къыддэгуащэ экономикэмкIэ факультетым и «Почетный студент» зыфиIорэ цIэр къыз­фагъэ­шъошэгъэ СтIашъу Джэ­нэт. — Илъэс еджэгъухэр гъэ­шIэ­гъо­ныгъэх, гукъэкIыжьэу сиIэщтыр бэ, тапэкIи магистратурэм сы­чIэ­хьа­жьынышъ сишIэныгъэхэм ахэзгъэхъонэу сэгугъэ. «Почетный студент» цIэр къызэрэсатыгъэм лъэшэу сырэгушхо. Факультетым анахь студент дэгъоу силъы­тагъ. Ащ инэу сигъэгушIуагъ. Iоф­тхьабзэр мыгъэ нэмыкIэу зэрэзэхащагъэр сыгу къеуагъэп. Апэрэу онлайн шIыкIэу рагъэ­кIокIыгъэм итарихъ тыщыщ. Ари тызгъэгушхорэмэ ахэсэлъытэ.

Джэнэт пшъэшъэ нэгушIоу щыт. Еджэныр зэрикIасэм дакIоу, университетым щызэхащэрэ Iофтхьабзэхэм чанэу ахэлажьэщтыгъ. Илъэс еджэгъу­хэр гъэшIэгъонхэу, гум къинэ­жьынхэу зэригъэкIощтхэм пы­лъыгъ. Джы, зы уцугъокIэ нахь лъагэу зиIэтыгъ ыкIи игъэхъагъэхэм зэрахигъэхъощтым щэч хэлъэп.

Гъонэжьыкъо Сэтэнай.