Уасэхэм гъунэ алъефы
2020-рэ илъэсым иапэрэ мэзищ хабзэр зыщыбгъэфедэн плъэкIыщт практикэм изэфэхьысыжьхэм зыщатегущыIэгъэхэ зэхэсыгъо монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ онлайн шIыкIэм тетэу щыкIуагъ.
Iофтхьабзэм тхьамэтагъор щызэрихьагъ монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ ипащэу ХьапэкIэ Аслъан. Ащ пэублэм къызэрэщиIуагъэмкIэ, гъэIорышIапIэм иIофышIэхэм аптечнэ организациехэм ыкIи зырызыщэ сатыушIыпIэхэм уасэу агъэуцухэрэм мафэ къэс гъунэ алъафы ыкIи Адыгеим медицинэ маскэм уасэу щыряIэм монополием пэшIуекIогъэнымкIэ федеральнэ къулыкъур щегъэгъуазэ.
2020-рэ илъэсым мэкъуогъум и 26-м ехъулIэу АР-м щашIыгъэ зэфэхьысыжьхэм къызэрагъэлъэгъуагъэмкIэ, маскэм гурытымкIэ сомэ 27-рэ чапыч 60-рэ ыуас.
Мы илъэсым гъэтхапэм и 26-м щыIэныгъэмкIэ цIыфым анахь ищыкIэгъэ медицинэ пкъыгъохэм ыкIи Iэзэгъу уцхэм ахэмыхьэхэрэм къэралыгъо екIолIакIэ иIэу гъэпсыгъэным фэIорышIэрэ Федеральнэ унашъом къэралыгъом ипащэ кIэтхагъ. Ащ къыкIэлъыкIоу, гущыIэм пае, мазэм къыкIоцI мыщ фэдэ медицинэ пкъыгъохэм ыкIи Iэзэгъу уцхэм ауасэ процент 30-м е ащ ехъоу къазыхахъокIэ къэралыгъом фитыныгъэ иI ежь уасэр ыгъэнэфэнэу ыкIи тедзэхэр афишIынхэу.
Хэбзэгъэуцугъэм къыдилъытэрэ лъэныкъо пстэури гъэцэкIэгъэныр, рекла-мэр, къэралыгъо ыкIи муниципальнэ фэIо-фашIэхэм язаказхэр, нэмыкIхэри зэшIохыгъэнхэм лъыплъэгъэныр 2020-рэ илъэсым иапэрэ мэзищым монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ ипшъэрылъ шъхьэIагъ. Джащ фэдэу федеральнэ къулыкъум естественнэ монополиехэм Iоф зэрашIэрэм гъунэ лъефы. А IофшIэныр зыфытегъэпсыхьагъэр ахэм къыдагъэкIырэ товархэр, агъэцэкIэрэ фэIо-фашIэхэр къызыIэкIагъэхьэнхэмкIэ зэкIэми зэфэдэ амал яIэныр ары.
ХьапэкIэ Аслъан къызэриIуагъэмкIэ, ГъэIорышIапIэм анахьэу ынаIэ зытыригъэтыгъэр унэе предпринимательхэм, хъызмэт субъектхэм ядэо тхылъхэм ахэплъэнхэр ыкIи зэхэфыгъэнхэр ары. Джащ фэдэу республикэм экономикэ хэхъоныгъэхэр ышIынхэмкIэ зиягъэ къэкIорэ ыкIи зэнэкъокъу шIыкIэр тэрэзэу зымыгъэфедэрэ пстэуми пшъэдэкIыжь ягъэхьыгъэным, гъэцэкIэкIо хэбзэ къулыкъухэм ыкIи чIыпIэ зыгъэIорышIэжьыпIэхэм япшъэрылъхэр шIуагъэ къытэу агъэцэкIэным мэхьанэшхо ратыгъ.
2020-рэ илъэсым иапэрэ мэзищэу пыкIыгъэм юридическэ ыкIи физическэ лицэхэм ядэо тхылъ 230-рэ къулыкъум къыIэкIэхьагъ. Административнэ пшъэдэкIыжьхэр зэрарагъэхьыщтхэмкIэ унэшъо 84-рэ ашIыгъ. Сомэ миллионым ехъу тазырыр къарагъэтыжьыгъ.
Монополием пэшIуекIорэ хэбзэгъэуцугъэр, зэзэгъыныгъэм ыкIи рекламэм епхыгъэ хэбзэгъэуцугъэр зэраукъуагъэхэмкIэ унэшъо 43-рэ ашIыгъ. Хэукъоныгъэ анахь инэу къыхагъэщыхэрэм ащыщых сатыум ылъэныкъокIэ хэбзэгъэуцугъэр укъуагъэ зэрэхъугъэр, «торгхэм» язэхэщэнкIэ зэзэгъыныгъэхэр зэраукъуагъэхэр, рекламэм икъегъэкIокIынкIэ хэукъоныгъэхэр къызэрэхагъэщыгъэхэр, нэмыкIхэри.
Ахэм ащыщых: муниципальнэ образованиеу «Каменномостскэ къоджэ псэупIэр, ПАО-у «Кубаньэнерго», «Мыекъопэ водоканалыр», МО-у «Къалэу Мыекъуапэ», пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Альянс», нэмыкIхэри.
УасэхэмкIэ ГъэIорышIапIэм федеральнэ къулыкъум зэпхыныгъэ пытэ дыриI. Хъызмэтхэр зезыхьэхэрэм, унэе предприятие инхэм, гъэцэкIэкIо хэбзэ ыкIи чIыпIэ зыгъэIорышIэжьынымкIэ къулыкъухэм ядэо тхылъхэм язэхэфын лъэшэу анаIэ тет.
КIАРЭ Фатим.